Sunday, February 1, 2009

وشهد شاهد من أهلها

ذكرت صحيفة روسية معروفة تصدر بأمريكا بتشددها للصهيونية العالمية وسيطرة اللوبي الصهيوني عليها بمقالها بالصفحة السابعة بعنوان (هل هذا نصر) سيتم هنا ترجمة بعض ما جاء بهذه المقالة علما أنه بعد نشر هذه الجريدة تم سحبها من الأسواق بسبب هذه المقالة
قال الكاتب: إن كنا ذهبنا الى غزة لإعادة شاليط ،،،، فقد عدنا بدونه.
إن كنا ذهبنا الى غزة لوقف الصواريخ ،،،، فقد زاد مداها حتى أخر يوم وزادت رقعة تهديدها.
إن كنا ذهبنا الى غزة لإنهاء حماس ،،،،، فقد زدناها شعبية واعطيناها شرعية.
إن كنا ذهبنا الى غزة لإحتلالها ،،،،، فقد ذكرنا أن قوات النخبة لم تستطع التوغل متر داخل غزة.
إن كنا ذهبنا الى غزة لنظهر أن يدنا هي العليا ،،،، فقد توقفت الحرب عندما قررت المقاومة وليس عندما قررنا
إن كنا ذهبنا الى غزة لنستعرض قوتنا ،،،،،،، فقد كان يكفي إجراء عرض عسكري في تل ابيب
إن كنا ذهبنا الى غزة لقتل قادة حماس ،،،،،، فقد اغتلنا اثنين من بين خمسمائة قائد في الحركة
إن كنا ذهبنا الى غزة لنكسب تعاطف عالمي،،،،،، فقد انقلب الرأي العام العالمي ضدنا ومن كان معنا صار ضدنا
إن كنا ذهبنا الى غزة لنعيد الثقة لجنودنا ،،،،،،، فقد زدناه جبنا كما زدنا مقاتل المقاومة ثقة بنفسه
إن كنا ذهبنا الى غزة لنثبت قوة الردع ،،،،،،،، فقد تبين ان السلاح بيدنا لا نجيد استخدامه على الارض بتجربتي 2006 + 2008 ولم نردع حزب الله و لا حماس وزادت تهديدات وكبرياء قادة حماس والله أعلم من القادم بعد انتشار هذه الثقافة بين شعوب المنطقة وهي ثقافة المقاومة والقدرة على الوقوف بوجوهنا ولا ننسى أنه خلال جميع لقائاتنا اثناء الحرب بهدف التهدئة لم نسمع طلب لحماس و لا مرة ايقاف اطلاق النار حتى طلبناه نحن فدعوني اسأل (( من ردع من ))
ووالله اعلم يوجد الان ثمانمائة ألف اسرائيلي وهم سكان الجنوب إذا ذكرت اسم حماس أمامهم ارتجفوا وذهبوا للملاجئ ((فمن ردع من ))
ويكمل الكاتب الأهداف و النتائج التي توصلوا اليها ويختم قوله:-إن هذه الحرب كلفت الكيان الصهيوني مبلغ عشرة ونصف تريليون دولار وهي قيمة ما تم دفعه على الحملات الإعلانية على مدى 40 عاما لتجميل صورة اليهود بالعالم فبخلال 22 يوم دمر الجيش الإسرائيلي كل هذه الحملات كما أن هذه الارقام لا تشمل المبالغ تكلفة الحرب
-كما لا تشمل الخسائر البشرية التي تكبدناها (عسكريين بالجبهة ومدنيين من الصواريخ) قال الكاتب عنها حرفيا ( خسائرنا البشرية بالحرب على غزة أنا أعرفها وأولمرت وباراك يعرفاها وجميعا ممنوعين من التصريح عنها)وأنهى مقاله بالقول هذه النتائج كلها تدعونا بالقول:
( كفانا كذب نحن لم ننتصر)!
..

Thursday, January 8, 2009

نقاط على الحروف

مقدمة
تحدثت اليه فى غزة .. لا أعرفه ولا يعرفنى
قلت له قلوبنا معاكم .. وسامحونا على تقصيرنا
قال لى جملة لن أنساها ما حييت
الصاروخ اللى بينزل علينا تحت .. بيطلعنا نحنا لفوق
قلت له ألا تتممنى أن تترك غزة ؟
قال لى أبدا .. ولا انا ولا أولادى
هادى أرضنا وبنضل صامدين
************
احداث غزة تتلاحق كل يوم .. والكلام بيزيد فيها والنقاشات بتتعمق
والحقائق بتتشوه .. وعشان كدة حبيت أحط شوية نقط على الحروف يمكن نقدر نقرا الواقع بطريقة أفضل
النقطة الأولى ... دم المسلم
كلنا نفسنا نحج .. والكعبة بيت الله الحرام بالنسبالنا حلم وشوق وحب
ولو قالوا ان اليهود خدوا جيوشهم وطياراتهم ودبابتهم عشان يهدوا الكعبة .. الكل هيهب ويقول انا فيها قتيل
طيب .. يقول النبى صلى الله عليه وسلم
"لأن تهدم الكعبة حجرا حجرا أهون عند الله من أن يهراق دم إمرئ مسلم"
فماذا أنتم فاعلون ؟؟
النقطة الثانية .. الهدنة
كثر الحديث عندما رفضت حماس استمرار الهدنة .. وبالتالى تبقى هى السبب فى اللى بيحصل لغزة
ولكن لما نعرف ان اثناء الهدنة التى التزمت بها حماس تماما ..اسرائيل قتلت أكثر من 40 شهيد على ايام متفرقة
ده غير الحصار اللى قطعت فيه الكهرباء والماء والوقود وقفلت المعابر فى وش المعونات الانسانية
يعنى بتموتهم برضه .. لكن موت بطئ
هل بعد كل ده المفروض حماس تجدد الهدنة وتقول ندخل معاهم فى هدنة تانى .. ولا طالما كدة موت وكدة موت يبقى نموت واحنا على الاقل بندافع عن نفسنا وعن كرامتنا ؟؟
النقطة الثالثة .. الموقف المصرى
للأسف الشديد بندافع عن موقف مصر وكأن اللى بيتهموها بيتهموا الشعب المصرى
لأ.. الحقيقة انهم بيتهموا الحكومة المصرية اللى المفروض مانحطش راسنا فى الرملة زى النعام ونقول انها عملت الصح عشان نحسن صورة مصر
لأن الحكومة المصرية مش هى مصر ... والمفروض نعترف بأن حكومتنا أخطائها فى موضوع غزة فاااااضحة
فى الأول ليفنى زارتنا وبعدها بيوم الحكومة قالت لحماس مافيش قصف وبعدها بيوم بدأ القصف وبعدها حماس قالت دى الحكومة المصرية قالتلنا مافيش قصف وبعدها الحكومة المصرية مانفتش كلام حماس
يبقى معناها اييييييييييه ؟؟
عندنا وزير خارجية أول ما بدأ القصف على الفلسطينين طلع يقول : والله احنا حذرنا واللى مايسمعش للتحذيرات لا يلومن الا نفسه
يعنى بالذمة ده كلام يطلع من مسؤل محترم فى وقت الناس بتموت فيه بالعشرات كل يوم .. وكأنه شمتان فيهم ؟؟
عندنا رئيس دولة قالها بصريح العبارة أدام وسائل الاعلام كلها: احنا لازم نستأذن سلطة الاحتلال "اسرائيل"فى اى حاجة بتدخل لغزة لحسن يكون فى سلاح ولا ذخائر ولا متفجرات داخلة وهى مش موافقة عليها"
يعنى بالذمة لما سمعتوا الكلام ده حسيتوا ان مصر دى واقفة مع مين ضد مين ؟؟
وبعدين فى حد المفروض انه بيساعد حد يقوم مستأذن عدوه أدخله ايه ؟؟
معلش .. اصل رئيسنا يعرف فى الأصول وبيعمل حساب "للضيف" اللى هو سلطة الاحتلال
بعيدا بقى عن الحرب اللى بدأت من كام يوم ... غزة محاصرة بقالها أكتر من سنة والكهرباء اتقطعت وكل حاجة اتقطعت ومصر ماتهزتش فيها شعرة ... يعنى مساندة كاملة لاسرائيل فى تجويعها و قتلها لأهالى غزة
النقطة الرابعة ... المظاهرات
ناس كتير تقول وايه فايدتها .. دى صوت عالى وجعجعة ع الفاضى
لكن بنقول .. أ- المظاهرات هى نوع من أنواع التعبير عن الرأى بشكل علنى
ب- المظاهرات تنشر القضية لمن لم يتابع .. وده حصلنا كتير واحنا فى مظاهرة الاقى واحدة جاية تقولى : هو فى ايه؟؟
فاشرحلها وانا حاسة بحزن عميق انها مش عايشة معانا فى البلد
ج- المظاهرات بطبيعتها وسيلة ضغط على النظام .. طبعا احنا النظام عندنا مابيحسش اصلا .. بس لو تلاحظو بعد المظاهرات فى مصر وغيرها ابو الغيط طلع صلح العك اللى قاله فى حق الفلسطينين فى بداية القصف
وبالرغم ان النظام عندنا مابيحسش الا بعد مية مظاهرة مثلا .. فاحنا برضه هنتمسك بحقنا وهنعمل المية مظاهرة لحد ما الدم يجرى فى عروقه
د- ودى نقطة مهمة قوى قوى .. الشيخ أحمد ياسين قبل استشهاده قال فى حديث مسجل له ان مظاهرة فى جامعة الاسكندرية كعملية استشهادية فى فلسطين .. هذه المظاهرات هى نوع من انواع الدعم النفسى والمعنوى لاخواننا فى فلسطين .. فكما ندعمهم ماديا بالمال والدواء لازم ندعمهم معنويا باننا نقول بصوت عالى ... احنا معااااااااااااكم
يعنى مش معقول حكوماتنا تحاصرهم وتذلهم عشان تدخل كام شاحنة دوا .. وكمان الشعوب يبقوا ساكتين وقاعدين فى البيت يمصمصوا شفايفهم
معلومة : كل ما أكلم حد من اهالى غزة اجده يطلب منى استمرار المظاهرات لأنها تدعمهم معنويا بشدة .. لانهم بيحسوا من خلالها ان الشعوب معاهم .. فإذن هم على الطريق السليم
النقاط مازالت مستمرة .. فى الحلقة القادمة ان شاء الله
..

Sunday, December 21, 2008

رفض الحذاء ورضى أبو مازن



طبعا الكل شاف "لاموأخزة" الجزمة وهى بتطير فى الهوا باتجاه بوش
ووراها الفردة التانية

لكن الغريب ان الاتنين ملمسوش بوش
تقريبا قرفوا .. وترفعوا عن ملامسة الجسد النجس ده

لكن أبو مازن ..راحله مخصوص لامريكا عشان يودعه ومد ايده وسلم عليه بحرارة


وبعقد مقارنة بسيطة بين الجزمة -عفاكم الله- وأبو مازن
تقدروا تقرروا مين الأغلى ومين الأرخص


********************


وده مقال غير عادى رفضت الصحف العربية نشره بعنوان


عباس الأول مع مرتبة (القرف)


كاتب المقال هو د. محمد العوضى


أضحكني بالأمس حديث استمعت إليه (صدفة) لسيادة , رئيس (الدولة) الفلسطينية محمود عباس على قناة (العربية) اتهم فيه حركة حماس بإفساد موسم حج أهل قطاع غزة، وقال إن منع الحج لم يحدث في التاريخ سوى ثلاث مرات فقط؛ مرة في زمن كفار قريش ومرة في عهد القرامطة وأخيرا في عهد حركة حماس!!
تأملت في هذا الكلام الغريب لشخص حفل تاريخه السياسي بالعديد من (انجازات الخزي) فكانت السابقة الأولى في التاريخ وليست الثالثة (كما يتهم حماس).
ودعني أذكرك يا( سيادة) الرئيس ببعض تلك (الأوائل)!! التي تمت في عهدك..
-


أول مرة يقوم فيها زعيم منظمة ثورية (تحريرية) بوصف عمليات شعبه الفدائية والاستشهادية (بالإرهابية) و(الحقيرة) وأسلحتها (بالعبثية) وينسق أمنياً مع العدو لاعتقال المقاومة!!
-


أول مرة يظهر فيها (رئيس) ضم وتقبيل وعناق و....!! لقتلة شعبه, وتراه ودون حياء يكيل لهم المديح والابتسامات في الوقت الذي تنتفخ فيه أوداجه حنقاً وغضباً لمجرد ذكر اسم أخيه (حماس).
-


أول مرة يتجرأ فيها جهاز أمن (رئاسي) على انتهاك حرمة بيوت الله وقتل أئمة المساجد وحفظة القرآن الكريم من بلده , وما دماء الشيوخ مجد البرغوثي ومحمد الرفاتي وناهض النمر ومحمد رداد الطالب الجامعي الحافظ لكتاب الله وحبيب الجميع؛ إلا اكبر شاهد على ذلك.
- وأول مرة تتواقح فيها شرطة ( الزعران) فيعتدون على حرائر فلسطين ويخلعون عنهن الحجاب والنقاب في الشوارع والجامعات.
- أول مرة يقوم فيها مستشار شخصي (لرئيس) بتهريب 3400 جهاز خلوي في سيارة التشريفات الرسمية أثناء عودته من مهمة (نضالية)!! واسأل تلميذك المدعو روحي فتوح عن رحلة عودته من الأردن يوم 19/3/2008، حين كشفته وفضحته أجهزة الجمارك الإسرائيلية, وغيره الكثير من (تلاميذك) ومستشاريك.
-


أول مرة يقوم فيها مسؤول فلسطيني بإغلاق اللجان الخيرية ودور تحفيظ القرآن وتجريم مؤسسات كفالة الأيتام ورعاية أسر الشهداء والفقراء, استجابة لإملاءات العدو ونكاية بنده السياسي.
-


أول مرة يقوم فيها حرس (رئاسي) بإلقاء شخص ملتحي (فتحاوي) من فوق برج (مهنا) غرب غزة من الطابق الرابع عشر وقتله ظناً منهم أنه (حمساوي)!! وكان ذلك بتاريخ 10/6/2007 مع الشاب المغدور حسام أبو قينص؟!!
كما اعترف القيادي الفتحاوي توفيق أبو خوصة في قناة الحوار ثم عاتبته فتح على هذا التصريح!
-


أول مرة يتفوق فيها (رئيس) على كل (الساديين) فتراه (وبدم بارد) يتفنن ويتلذذ بمشاهدة وسماع آلام وآهات مليون ونصف من شعبه المحاصر بالجوع والمرض والظلام في قطاع فقير وصغير تأديباً وعقاباً له على اختياره في الانتخابات للفصيل المنافس.
-


أول مرة يقوم فيها رئيس بالتمسك باتفاقية حدودية مهينة ومذلة تنتقص من سيادة(دولته)، وتعطي لعدوه سيطرة كاملة على منافذ شعبه وموارد بلاده, بل وتصل به المهانة حداً يقاتل فيه كل من يحاول إلغاء وتعطيل هذه الاتفاقية.. أليس هذا واقع حال اتفاقية معبر (رفح) التي وقعها مع إسرائيل توأمك (النضالي) محمد دحلان عام 2005؟!
_


قائمة (الأوائل) في عهدك (ياريس) طويلة طويلة يعرفها إخواننا في فلسطين أكثر من غيرهم , صحيح أن الإعلام المضلل يتغاضى عنها وقد يجهلها الكثيرون, ولكن التاريخ سيسجلها لك بأحرف من (قرف) تشمئز منها الأجيال.
ومع ذلك فكل (الأوائل) في عهدك (ياعباس) قد تهون عن كونك (الزعيم) الأول في التاريخ القديم والمعاصر الذي يأمر (عصاباته) باغتيال المقاومين الشرفاء فيما يسابق عدوه إلى تقديم التنازلات له عن كل شيء بدءاً بالأرض وانتهاء (بالعرض)!!
*


ملاحظة: منع المقال من النشر في صحف عربية بسبب قانون المطبوعات الذي يمنع المساس المباشر برؤساء الدول, وكان موعد نشره أول أيام العيد المبارك.


Monday, December 1, 2008

اللى تعوزه غزة يحرم ع الدويقة

غزة .. لا فلوس .. ولا أكل .. ولا نور .. ولا شغل .. ولا أى حاجة


كتب الصحفى عمرو جاد فى جريدة اليوم السابع بتاريخ 25/11/2008 مقالا بعنوان " اللى
تعوزه الدويقة يحرم على غزة"
يتناول فيه فتوى الدكتور يوسف البدرى
عضو مجمع البحوث الأسبق اللى قال فيها ان التبرع لغزة هيكون
مقبول لما المصريين يستكفوا , وفقراء مصر أولى باللحوم


وتضمنت الفتوى اعتراض على مشروع أضاحى فلسطين اللى بيعمله اتحاد
الأطباء العرب لاهالى غزة


وده المشروع اللى استند لفتوى الدكتور على جمعة لما قال "فلسطين أولى بالأضحية

طبعا الناس هتستنتج من عنوان البوست انى متحيزة تماما لغزة على حساب الدويقة

لكن الحقيقة انه مستحيل اكون معترضة على مساعدة الفقرا فى مصر زى اهالى
الدويقة وغيرها من المناطق العشوائية اللى بجد اهلها عايشين تحت
خط الارض مش تحت خط الفقر .. بالعكس انا نفسى الناس كلها تقوم
بدور ايجابى مع الفئة المستضعفة دى فى مصر وبجد اللى يعرف اى
جمعية خيرية بتهتم بيهم يشارك فيها بالمال والجهد
..
بس تعالو بقى نقارن العيد الكبير فى الدويقة وغيرها من المناطق الفقيرة فى مصر وفى غزة

فى مصر الالاف من الناس هيدبحوا وكل واحد منهم لازم هيدى تلت
للفقراء .. والفقراء دول اما عارفهم او بيروح للجمعيات الخيرية
الاهلية المتخصصة فى مسائل الحالات الانسانية وما أكثرها بفضل الله
فى مصر

رحت قبل كدة مع مجموعة من المتطوعين غير المنتمين لأى مؤسسة
رسمية وكانوا ماشاء الله لاقوة الا بالله عاملين شغل منظم جدا لحالات
انسانية تسكن فى منطقة متطرفة جدا من الاسكندرية .. وعاملين جدول
بالحالات وكل حالة ناقصها ايه ووصلها ايه ..ولما رحت... شفت اماكن ومناطق عمرى ما كنت أتخيل وجودها اصلا على الخريطة
وشفت ناس حالتهم باينة عليهم من غير مايحاولو يوصفوا او يطلبوا

الشاهد فى الموضوع ان الناس دى بفضل الله فى الاخر فى حاجة
بتوصلهم وفى ناس بتدور عليهم وتساعدهم سواء متطوعين بشكل
فردى او موسسات مدنية وجمعيات خيرية

والدويقة منطقة الاعلام سلط عليها الضوء بشكل واسع وخدت من
التعاطف الشعبى والمساعدات الأهلية اللى ماخدتوش غيرها من المناطق
الفقيرة جدا فى مصر اللى عمرنا ما سمعنا عنها... وده برضه مش معناه انها استكفت لكن المقصود ان فى عين عليها
وفى قدر من الاهتمام بيها
لكن غزة المحاصرة .. وضع غريب ... حصار اسرائيلى محكم على كل أبجديات الحياة من كهرباء ووقود وماء
واغلاق معابر فى وجه المرضى والحجاج
ثم
تواطؤ عربى غير مفهوم اسبابه فى الحصار .. وتخاذل عن تقديم أبسط أنواع المساعدة من أدوية وغذاء ومساعدات انسانية كانت بتقدمها زمااان

بجد فى شئ غريب الفترة دى ... مافيش دولة عربية بتبذل أدنى جهد
لمساعدتهم .. وكأن الألسنة كلها اتقطعت ... صممممممت


لما نيجى دلوقتى ونقول للناس اللى عايزة تتبرع بأضاحى لأهل غزة
عن طريق مؤسسة ليها مكانتها فى الوطن العربى زى اتحاد الأطباء
العرب .. نقول لأ المصريين محتاجين !! يعنى مش كفاية الحصار من اليهود والأمريكان والحكومات العربية .. نيجى احنا كمان الشعوب والأفراد ونبخل بالمساهمة البسيطة اللى كنا بنشارك بيها !!!ء
ده ايه الظلم ده !!!
شئ غريب .... شعب اتفق على تدميره كل العالم ومازال صامد

..
ياريت يا جماعة نراجع أفكارنا تانى ناحية أهل غزة اللى بجد كل حاجة
خلصت من عندهم ونتابع أخبارهم على الجزيرة عشان نشوف الصورة كاملة

وجنيه هنا وجنيه هناك وربنا هيبارك فى ده وده ان شاء الله


..

Thursday, June 26, 2008

بفضل الله

"قل بفضل الله وبرحمته فبذلك فليفرحوا هو خير مما يجمعون"

لا يسعنى فى هذه اللحظات الا ان استجيب للأمر فى الاية و اقول "بفضل الله "..... بجد كل اللى بيحصلنا بفضل الله

كل الاحداث الحلوة اللى بتمر بينا بفضل الله

الحقيقة اليومين دول بفضل الله تمر عليا عدة احداث حلوة كتير لكنى هشارككم حدث مرور سنة على مدونتى الجميلة الرقيقة الشقية

شقاوة شعب

يعنى شقاوة شعب كبرت وبقى عندها سنة .. وطلعلها سنتين تحت ونص سنة فوق

سنة اتعرفت فيها على ناس كتييييير مدونين وناشطين على الانترنت ... اثروا كتير على افكارى وثقافتى ومتابعتى للاحداث

كان اغلبهم ناس تستحق انها تتعرف وكان شرف كبير ليا فعلا انى اتعرفت عليهم على اختلاف توجهاتهم وافكارهم

وقلة قليلة كانت هى الزبد .. ورب العزة تبارك وتعالى يقول

"وأما الزبد فيذهب جفاءَ وأما ما ينفع الناس فيمكث فى الارض"

خلال سنة من التدوين ...لاحظت بعض الملاحظات

1- انتشار التدوين بصورة مذهلة فى مصر بين الشباب ودى حاجة مبشرة جدا وجيدة وظاهرة تستحق المتابعة

2- زاد التواصل بشكل سريع بين المدونين وده أدى لكثير من التنظيمات والمؤتمرات والتجمعات اللى تبنت قضية معينة واشتغلت عليها وده برضه شئ رائع لانه بيعزز دور المجتمع المدنى

3-مع الاسف اغلب المدونين المصريين يدوروا فى نفس فلك التدوين وقليل لما تلاقى فكرة جديدة للمدونة او اسلوب مختلف للعرض

4- لما بيحصل حدث كبير فى مصر ... تقريبا كل المدونات بتكتب عنه فى نفس التوقيت

5- لسا محتاجين كمدونين وكشباب مصريين نتعلم اكتر اسلوب الحوار ونفهم بعض ونحترم بعض على اختلاف افكارنا وتوجهاتنا

ده رب العزة تبارك وتعالى قال " ولا يزالون مختلفين الا من رحم ربك ولذلك خلقهم " فالاختلاف سنة الله فى الارض

كفاية كدة انهاردة ملاحظات .. واحب انكم تشاركونى مشاهدة الفيديو ده لشروق الشمس
احتفالا بمرور سنة على مدونتى ... ولان الشروق فى حد ذاته معنى تحقق بفضل اللى فى حياتى هذه الايام


Saturday, May 24, 2008

يوم الامتحان .. يحل المرء أو ينام



بمناسبة فترة امتحنات اخر السنة ....هذه الفترة العظيمة المباركة اللى بينزل عليا فيها النوم بشكل مش طبيعى
بركة بقى تقولوا ايه
هذه الفترة تنتهى -فى بعض الاحيان- بالذهاب للامتحان
وهنا مربط الفرس
لانك لما هتروح الامتحان .. ادامك حل من اتنين
يا هتفتكر الاجابة يا اما مش هتفتكر الاجابة
فى حالة افتكرت الاجابة هتمسك قلمك ... وتنطلق .. محدثا به ضجة علمية رهيبة سيقف امامها علماء القرن الحادى والعشرين محتارين مذهولين
فى حالة مافتكرتش الاجابة .. ادامك حل ماتنين
يا هتقعد تعيط (هيغمى عليكى لو بنت) ....يا هتنام
فى حالة ان دموعك اسعفتك وعيطت (دماغك اسعفتك ودختى) يبقى ادامك حل من اتنين
يا اما هتصعب على المراقب فيسيبك تتكلم مع اللى جمبك ... وساعتها هيبقى شكلك مش حلو خااااالص
يا اما مش هتصعب عليه وهيناديلك رئيس اللجنة يشوفله صرفة معاك
فى حالة بقى ان دموعك ماسعفتكش وقررت انك تنام ... فادامك حل من اتنين
يا ينزل عليك الالهام وتشوف الاجابة فى الحلم ... وده فى حالة ان الست الوالدة لحقتك بدعوتين وانت ع الباب
يا مش هينزل عليك الالهام وهتشوف حلم تانى تدور احداثه فى شهر 7 .. وورق ابيض فى ابيض متعلق على حيطة بيضااااا
وفى نصه دايرة سودة غريبة مكتوب فى نصها .... ض


******

مازلت سيادتك لسا نايم ... نايم ...نايم
وهنا هتحصل حاجة من اتنين
يا هتقوم فجأة بعد ما شفت الاجابة فى الحلم وتجرى تكتبها فى اخر 10 دقايق مستخدما خط اشبه ما يكون
"بلوحة فنية تشكيلية لحركة المرور المصرية"
يا اما هتقوم مفزووووع على صوت غريب طالع من حنجرة محشور فيها ضفدع
وبيقولك : الوقت انتهااااااااااا
وفى جميع الحالات ... هتسلم كراستك النضيفة اللى زى الفل وانت تردد

انا لله وانا اليه راجعووون


وربنا يوفقنا جميعا

..

Saturday, May 3, 2008

مدخنون ومدخنات



مما لا شك فيه -دى الجملة اللى اتعودنا نبدأ بيها موضوعات التعبير- اننا كلنا دلوقتى ملاحظين زيادة عدد المدخنين فى الشعب
المصرى
بس مش ده الجديد ... الجديد هو زيادة عدد المدخنات فى الشعب المصرى
وده طبعا بعد ما بقت الشيشة موضوة قديمة جدا





تقريبا مش هتنزل الشارع فى اى يوم تقضى اى مشوار من غير ماتقابل عربية معدية ادامك سايقاها ست وفى ايديها سوجارة
ومش هتروح او هتروحى النادى من غير ماتلاقى الترابيزة اللى جمبك عليها اسرة والأم قاعدة فى النص وفى ايديها
السوجارة

الموضوع فعلا زاد بشكل مش طبيعى وفى فترة قصيرة جدا .. والملاحظ انه بين الطبقات الاجتماعية المرتاحة
مما يدل على انها من قبيل " الموضة" او يمكن " المنظرة" او ايا كان التفسير فمش ده اللى محيرنى
الحقيقة اللى محيرنى وعايزاكم كلكم تشاركونى فى تفسيره

هو كيف ننظر للمرأة المدخنة ؟؟؟

بمعنى .... هل نبدأ نناقش المشكلة من باب ان ازاى الستات تمسك سيجارة وتدخن فى الشارع
ده مخالف للحياء .... فين التربية ..... دى المفروض بنت ..... ده غير انها بتتسبب فى فتنة غيرها من البنات اللى هيحبوا يقلدوها
؟؟

ولا

نناقش المشكلة من باب إن حرمانية التدخين عامة .. . على الراجل والست
واضراره الصحية عامة ... على الراجل والست
والمسألة مش مسألة اللى ماسك السجارة ده جنسه ايه .... لكن المسألة مسألة كيف نساعده على الاقلاع عنها ؟؟؟


ياريت بجد اعرف رأيكم بكل حرية وشفافية ونزاهة
-ودى الجملة اللى اتعودنا نسمعها من الحكومة-




..

Sunday, April 13, 2008

الى زميلى من الحزب الوطنى




ليا زميل دراسة ينتمى الى الحزب الوطنى ..وهو راجل أكبر منى فى السن بحوالى عشرين عام وماتستغربوش لأن الدراسات العليا فيها كل الاعمار
وفى يوم سألنا الدكتور المحاضر :
تعرفوا ايه هى نشأة الحزب الوطنى ؟؟
وطبعا السؤال موجه بشكل خاص لزميلنا ده لاننا كلنا عارفين انه من كبارات الحزب
فأجاب الزميل بكل ثقة :
اه طبعا ... الحزب الوطنى اللى هو كان زمان الحزب الوطنى بتاع الزعيم مصطفى كامل
وهنا وقع الجميع بما فيهم الدكتور فى الضحك ... فالعضو الكبير بالحزب الوطنى مايعرفش تاريخ حزبه .. ويربطه بالحزب الوطنى اللى أسسه مصطفى كامل فى عام 1907
وبعدين الدكتورعاد السؤال :
ها ياجماعة .. مين يعرف ؟؟
فأجاب احد الزملاء "صاحب توجه اسلامى" بأن الحزب الوطنى اللى موجود حاليا هو فى حقيقته حزب مصر العربى الاشتراكى اللى أنشأ فى 1978 لما اتفتح باب تأسيس الأحزاب فى الوقت ده ..وبعد كدة اتغير اسمه الى الحزب الوطنى الديمقراطى
فكانت اجابة سليمة صدق عليها الدكتور والعديد من الزملاء

قبل ما اقٌولكم واحدة "هل تعلم " هقولكم ان زميلنا من الحزب الوطنى لوجت محاضرة بتتكلم عن تاريخ فلسيطن من الناحية السياسية ...تلاقيه يقول فى تذمر بصوت مسموع : احنا مالنا احنا بس ومال فلسطيييييين ؟؟لو بدات مناقشة بين الزملاء واحد المحاضرين عن الأوضاع السياسية الحالية تلاقيه يقول : انتوا هتنخنقونا ليييييييييه ؟؟
ولو جت سيرة اى موضوع سياسيى ...لازم تلاقيه متذمر ومضايق ...مش عارفة طب جاى على نفسه وبيدرس ليه ؟؟

هل تعلم
هل تعلم ان هذا الزميل هو احد نواب المجلس المحلى عن الحزب الوطنى اللى فازوا بالتزكية فى الانتخابات اللى كانت من كام يوم؟؟
هل تعلم ان هذا الزميل رايح يحلف اليمين يوم الاربعاء القادم ؟؟
حد يقولى ده بقى هيحلف على ايييييييييييه ؟؟

موقف اخر
الدكتور بيتكلم وبيناقش الاوضاع الراهنة ...فمن غيظه غلط فى الذات الحزبية الوطنية الديمقراطية
واحتراما لوجود ذلك الزميل قاله بهزار :
اوعك تكون زعلان يا استاذ ...... ء
رد الزميل قائلا : لا ولا يمهمك يا بيه .... النظام قوى ومستمر

وهنا ارد انا بقى على الزميل بكام قصة وحكاية صغيرة ... تثبت عكس نظرية " النظام قوى ومستمر" ء

فرعون


إن فرعون وهامان وجنودهما كانوا خاطئين -- سورة القصص 8
وبالتالى لم يستثنى الجنود من العذاب
ولم يستثنى الجنود اللى قالوا : انا عبد المأمور
ولم يسلم هامان من نفس النهاية المؤلمة لسيده ... لأنه مشى على خطاه واقتفى أثره وسار على منهجه الظالم ...فكانت النتيجة واحدة


السادات


ظلم وتجبر واعتقل وقتل وخاصة فى اخر ايامه
وسب أحد علماء الدين الكبار علنا فى تسجيل مصور
ثم ماذا كانت النتيجة ؟؟ النتيجة جاءت من بين صفوف جيشه

شارون


المخ اللى دبر وخطط وحاك المؤامرات والحروب جاتله جلطة .. تطورت الجلطة الى شلل تام فى الأطراف وصل للجفون
تطور الأمر الى جسد يتعفن رغم ان صاحبه مازال على قيد الحياة


حمزة البسيونى وصلاح نصر
اثنين من زبانية عبد الناصر .... لو حكينا على قصص تعذيبهم للمعتقلين فى سجون عبد الناصر ستقشعر الأبدان وتدمع العيون
حمزة البسيوني بلغ به التجبر والطغيان إلى حد أنه كان بيقول للمعتقلين من اصحاب التوجهات الاسلامية وهو بيعذبهم حينما يستغيثون بالله : فين الهكم ده عشان أحطه في الحديد !!!!! ء
حمزة البسيوني وهو خارج من القاهرة إلى الإسكندرية خبطت عربيته فى شاحنة شايلة حديد فدخل الحديد في جسمه، من أعلى رأسه إلى أحشائه، وماقدروش يطلعوه إلا حتت

أما صلاح نصرفجاتله أكثر من عشرة أمراض مؤلمة، مزمنة ولم يجد له الطب علاج ، لحد ما مات سجين في زنـزانات زعمائه اللى كان بيخدمهم
"إن الله ليملي للظالم، حتى إذا أخذه لم يفلته" حديث



أبو جهل
أكثر من آذى النبى صلى الله عليه وسلم وكاد للاسلام والمسلمين.... وهو اللى سماه النبى صلى الله عليه وسلم "فرعون هذه الأمة " أى أمة الاسلام
وفى غزوة بدر جاء صبيان صغيران لسيدنا عبد الرحمن ابن عوف وقالوا له : ياعم اين ابو جهل فاننا سمعنا انه سب رسول الله وقالت لنا أمنا لا تعودا إلا وقد قتلتماه
استغرب سيدنا عبد الرحمن ابن عوف من الصبيين لكنه شاورلهم على ابوجهل
فانطلقوا كالسهام لحد ما وصلوله وضربوه ضربة رجل واحد


صدام

اللى ماكانش حد يقدر يتنفس فى بلده ولا يقول كلمة ولا يعبر عن رأيه
اللى كان بيبوس رجل الأمريكان ..اللى عمل كل حاجة عشان يرضيهم ومرمط شعبه فى حروب مالهاش اول من اخر
هما اللى قتلوه وأعدموه فى يوم عيده



موسوليني


صاحب النظرية الفاشية التى تمجد الأمة –بتطرف- على حساب كل الأفراد
اعدم مع اعوانه السبعة عشر في ميدان "دونجو" بميلانو على ايد الشعب الايطالي عام 1945




ستالين


الدكتاتور صاحب القبضة الأمنية التى لم يكن لها مثيل
وزيره "بيريا" حطله سم فى العشا وبعدها بأربع ايام مات فى مارس 1953



كل القصص والنهايات اللى قلتها لأقول لزميلى من الحزب الوطنى انه ليس من باب الشماتة
وانما من باب : "فذكر فان الذكرى تنفع المؤمنين" ء
ولأقول له ايضا

أن نظامك ليس قوي .. ولن يستمر

ان شاء الله ... وهذه سنة الله فى الأرض وفى الأمم
..

Saturday, April 5, 2008

عدنا



انهاردة يبقى مر شهر بالظبط من ساعة اخر بوست كتبته على شقاوة شعب
شهر من اغرب شهور حياتى
شهر من الاحداث المتلاحقة والمؤلمة والمفاجأت والاكتشافات الغريبة
شهر بكيت فيه كتير واحترت كتير واتكلمت كتير وفى نفس الوقت سكت كتير
شهر وصلتنى فيه رسائل كتير ...رسائل بعتتهالى الحياة ..ورسائل تانية ربانية من الله عزوجل
نقلة تانية فى تفكيرى .... ووقفة مع النفس ...ومراجعة لكل احداث الفترة الماضية من حياتى

قبل ما استعرض معاكم جزء من الرسائل اللى وصلتنى ........ عايزة اقولكم يا كل المدونين وياكل المتابعين لشقاوة شعب

بجد وحشتوووونى جدا جدا

ونفسى امر على مدون مدون ومدونة مدونة ارمى السلام واقولهم ان الحياة من غير المدونين ناقصها كتير قوى
وعايزة اقول لمدونتى شقاوة شعب انها وحشتنى بشكل مش طبيعى ...ووحشنى قوى الكتابة فى صفحة كرييت بوست
ووحشنى قوى باسوورد المدونة اللى مش بكتبه غير وانا داخلاها
ووحشتنى قوى تعليقات الناس وردودى عليهم

مش عارفة ازاى قدرت اعيش الفترة اللى فاتت من غير شقاوة شعب
وهى الحياة ايه غير شقاوة شعب

بالمناسبة ....... بكرة شعب مصر هيتشاقى شقاوة كبيييرة قوى ماجربهاش قبل كدة
اضرااااااب .... سيدى يا سيدى على شعب مصر اما يتحرك ...مارد ان شاء الله
وبمالناسبة برضه عايزة اشكر كل الناس اللى علقت فى بوست
"كم هو مؤلم ذلك الألم"
وبجد تعليقاتكم غالية عليا قوى



تعالوا بقى نرجع للرسايل وناخدها كدة رسالة رسالة

الرسالة الأولى

احيانا بنتعامل مع الله عزوجل من منطلق "هو انا مش من حقى كذا كذا" وكأنه حق مكتسب
ومش واخدين بالنا ان لو ربنا سبحانه وتعالى عاملنا على اساس الحق والمستحق هنضيع لان ذنوبنا فى حقه "عزوجل" كفيلة باننا نروح ورا الشمس وكفيلة باننا مايكونش لينا اى خير عنده -سبحانه وتعالى
لكن لما بنتعامل معاه من منطلق الامل فى رحمته .... بنلاقيها اوسع مما نتخيل


الرسالة التانية

قد ايييييه الدنيا دى صغيرة
صغيرة قوى قوى لدرجة تخنق ....ومافيش حاجة فيها بتستخبى
فاللى هيكذب مسير الدنيا تلف تلف وكذبته تبان ...بأى طريقة مباشرة او غير مباشرة
ودى مش حاجة حلوة ابدا ابدا ........ اقصد صغر الدنيا
لان احيانا بنتمنى اننا مانكتشفش كدب اللى حوالينا .... لأن يمكن الكدبة طعمها حلو
يا خساااارة


الرسالة الثالثة
الناس الاكثر إبهارا ...... هم الاكثر قدرة على اخفاء عيوبهم
يعنى فى الناس بنقابلهم فى الدنيا ....يااااااه ....نجوم
الناس دول مستحيل مايكونش عندهم عيوب ..لكن الفرق بينهم وبين غيرهم انهم بيقدروا يداروا عيوبهم
اما التانيين فعيوبهم باينة عليهم و بالتالى مالهمش بريق ولمعان
وعشان كدة صدمتنا بتبقى كبيرة فى "النجوم" دول عن الناس التانية


الرسالة الرابعة

مافيش حد سوى نفسيا مية فى المية
طالما عاش فى وسط مجتمع وبيئة وحكمته ظروف واحداث ... يبقى اكيد اثرت على نفسيته ايجابا فى جزء وسلبا فى جزء تانى
وبالتالى داخل كل منا كلاكيع وفيونكات غريبة الشكل والمضمون ...يمكن مش باينة ومش عارفينها لان ماجاش الحدث اللى يظهرها على السطح
لكن اول مابيجى الحدث المناسب ...اللى ممكن مايجيش الا بعد سنين طويلة من عمر الانسان
ساعتها هتتجلى بوضوح فيونكاته الكامنة فى صميم ونغاشيش عقله



الرسالة الخامسة

ربنا عارفنا
اه والله عارفنا ....وعارفنا اكتر من نفسنا
احيانا بيتهيألنا اننا عايزين حاجة قوى قوى ....بس ربنا عارف اننا فى حاجة تانية عايزينها اكتر بس مش واخدين بالنا لانها
الحاجة التانية - لسا ماظهرتش فى حياتنا
بس ربنا بقى علام الغيوب ...عارف اللى جاى ...وبالتالى عارف ساعتها هيكون ايه اختيارنا
عشان كدة مانفذش طلبنا فى ساعتها لانه -سبحانه وتعالى- عارف رغباتنا اكتر منا



اظنكم دلوقتى بتقولوا ايه الطلاسم دى ...وهى ايه الحكاية بالظبط
لكن اللى طالباه المرادى ان ماحدش يخمن
اه ماحدش يقول فى باله ...واضح كدة ان القصة هى كذا كذا
لانى ببساطة هقوله غلط
المهم ....ومن غير مانقول القصة ايه ...حاولوا تاخدوا الكام رسالة دول تحفظوهم فى عقلكم وقلبكم
ومسير الايام تمر وتثبتلكم انها كانت رسائل فى الجون

ووحشتونا


..