عندى سؤال دايما شاغلنى
ليه لو فى لوحة مرسومة ومحطوطة على حيطة وجه واحد اجنبى يقيمهااول حاجة بيقولها
woooooowooo
fantastic
wonderful
amazing
..
ولو واحد مصرى جه يشوف نفس الصورة ويقيمها هتكون اول كلمة تطلع منه
بس لو كانت الزاوية اللى فوق دى تتعدل شوية كانت هتبقى رائعة
..
السؤال ده بيلح عليا قوى اليومين دول لانى باخد كورس مدته طويلة شوية ومعايا فيه شخصيات عمرى ماشفت زيها فى حياتى
بتنتقد كل شئ ادامها ,,مش بيعدى عليهم حاجة كبيرة او صغيرة الا لما يطلعو فيها القطط الفاطسة
:
الادارة مش بستجيب لكذا وكذا
الشركة الام مش بتراقب جودة التدريس
الكتب مش بتفهمنا
السكرتيرة دمها تقيل
التكييف مش بيسقع كويس
البريك إيريا مش مريحة
المكان ضيق
الهارد وير مش قوى
الداتا شو مش عارفة مالها
...
ده اللى انا قدرت افتكره لكن القايمة مازالت طويلة
ومش ممكن ابدا ومستحيل تسألهم عن الوضع ويقولوا ميزة واحدة بس فى المكان
مع العلم انه مكان محترم جدا ومستواه عالى قوى كمان
وواخد امتياز لاعطاء كورسات شركة عالمية
بس اللى مش بيعجبه حاجبة لو عملناله اللاللى مش هيرضى
وطبعا الانتقادات مش بتقف عند حد النقد وخلاص
لأ طبعا دى بتتطور دايما لحد ما تبقى مشاكل ومشاكل كبيرة قوى كمان
...
لكن يا ترى ليه الناس دى بتنتقد بالشكل ده؟؟
مش ممكن كل الحجات دى وحشة فعلا زى ما بيقولوا
انا بعتبر الانسان اللى بينتقد كتير ده انسان اصلا غير ر اضى عن نفسه فبيحاول يبرر لنفسه تقصيره بانه يرمى الغلط على الناس التانية
وكمان هو اكيد انسان مش سعيد فى حياته لانه لو كان سعيد سعادته لازم هتبان عليه وهتخليه يشوف كل حاجة حلوة
بدل ما هو لابس نضارة سودا بيشوف بيها الدنيا
والخوف انه يكون كمان انسان تافه مافيش فى حياته قيمة او هدف كبير يجرى عليه
فمقضيها تفحيص وتمحيص وتفصيص لكل حاجة ولكل فعل من اللى حواليه
...
بجد احنا محتاجين نقلل انتقادتنا شوية خاصة فى الحجات اللى مالهاش معنى ومش هيترتب عليها استفادة حقيقية
ونحاول نبص لكل حاجة حوالينا بنظرة كلها تفاؤل ورضا
12 comments:
فعلا المصريين بيحبوا ينتقدوا جدااا اى حاجة و مش نقد لا و تريقة كمان مش نقد بناء حتى و يطلعوا فى كل حاجة عيوب
و بيشيلوا الظروف و الدنيا اللى حواليهم كل الاخطاء و النقد عليها
بس كل شئ ليه مزايا وعيوب و احنا بنبص على العيوب و ننقد و بننسى المميزات او بنشوفها المميزات دى عيوب برضه
تحياتى
مشكلة الناس دى إنها بتبقى محبطة للى حواليها
وبتبقى مراية لكل ما هو سلبى
ده غير إنها بتبقى غير قادرة على عمل أى شىء إيجابى لما تعانيه فى داخلها من عجز وإلحاح فى رؤية السلبيات
والحقيقة الحالة دى استشرت بين المصريين جداً لظروف كتيرة وأصبح النموذج الإيجابى زى العصفور اللى بيغرد خارج السرب
لذلك يجب علينا ان نشجع النماذج الإيجابية اللى بتزود الأمل والإيجابية عند الناس رغم كل المعوقات والصعوبات(الأستاذ عمرو خالد نموذج طيب على ذلك رغم كل ما واجهه من سلبيات)
لعل وعسى يزداد المتحررون من النظارات السوداء.......
************
ملحوظة يا أخت شيماء.....
لينكات المدونات عندك على المدونة مش مظبوطة فيها
http:// زيادة
لذا لزم التنويه للتصحيح
وجزاك الله خيرا...
بالمناسبة هى الكورسات دى فى اى مجال....
وبالتوفيق دائما
السلام عليكم
تحية على الطرح البسيط الخالى من التعقيدوالممتلئ بالتلقائية
بعض الناس فعلا لايعجبهم شئ وينظرون فعلا لنصف الكوب الفارغ ولو نظرنا نجدهم سلبيين وغير مبادرين كل همهم الظهور لا يمكن تجدهم فى صفوف العمل والدأب بل فى ذيل طابور النشاط لذلك يحاولون إخفاء عجزهم عن الإنجاز بالصوت العالى والتذمر ونصيحة لمن أراد النجاح تنح عن هؤلاء وواصل عملك ولا تلفت لما يخوفونك منه حتى لاتصيبك عدوهم
ربما كان هناك نوع من توافق الافكار . لاني فعلا بفكر في الموضوع ده .... لكن لاقيت ايييه :
اولا ان وضعنا في مصر سئ للغاية وبالتالي سادت روح اظهار العيوب ودي اقوي من روح الاصلاح اللي صعبة واللي لسه ماشية ببطئ
ثانيا : ده نوع من التنفيس عن الواحد لانه في حاجت كتيرة جدا جدا مش بيعرف يقوول رايه فيها بصراحة وكل بينها عامل مشترك هو القهر او الظلم او استغلال النفوذ او ..
وبالتالي فبتكون فرصة انه يطلع غلبه في لوحة ولا في واحد جنبه بالعربية . ولا واحد كلامه بطريقة ما عجبتهووش
يعني اسد عليا .....
عشان نكون منصفين لازن نؤيد استاذ ياسر فى اللى قاله
وفعلا فى عوامل كتير فى حياة الناس بتخليهم ما يشوفوش غير الجوانب السيئة للاشياء
لان فاقد الشئ لا يعطيه
والمصريين كل يوم بيشوفوا فى حياتهم بلاوى فلو حتى ادينالهم احلى حاجة فى الدنيا واحسن خدمة برضه هيطلعوا فيها عيوب
بصى انا مش ضد النقد .. بس فى نوعين من النقد نقد بناء ونقد هدام ... فالنقد البناء انك بعد ماتنقدى تتبعيه بحلول .. اما النقد الهدام فانا اعتبره نقد محبط وملوش اى لزمه
جزيتى خيرا على البوست
بجد
woooooowooo
fantastic
wonderful
amazing
thats too good
يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل
اعتقد انه من الصعب تاخير الميعاد لان فيه كتير عارفينه وجايين فى نفس الوقت لو حضرتك عرفتى تيجى مع اخت من اسكندرية وتروحوا مع بعض اعتقد هتبقى اسهل والله لو كان ينفع كنا قدمناه بس هو مش فى ايدى اصلا تقديمه او تاخيره وشكرا للاهتمام
سلام عليكم
alaa.eg@gmail.com
ده ايميلي
ياريت حضرتك تراسليني النهاردة ضروري
بصى يا اختى الكريمة
دى عادة فينا احنا
كشعب يعنى
بنحب او الانتقاد حتى لو مكنش ليه لازمه
زى ما واحد مش عارف موضوع معين بس بيعاند عشان محدش يقول عليه انه مش عارف
دى ممكن نقول عليها مرض نفسى
او ممكن نقول عليها
عادة من عادات شقاوة الشعب
it's time of changing
Post a Comment