معرض الكتاب

امبارح رحت معرض الكتاب الدولى فى القاهرة
كالعادة المعرض كبيييير -ماشاء الله- ويستحيل يخلص فى يوم واحد... ولا حتى يومين
بصراحة المعرض كان متميز جدا وخدماته للزوار واضحة.. وفى تسهيلات فى الحركة والتعامل
وبرضه التخفيضات مش بطالة
كان فى عدة ملاحظات اخدت بالى منها
اول حاجة معرض الكتاب مبقاش زى زمان ... عدد الزوار قل جدا رغم انه كبير

صحيح بقالى كام سنة ما روحتش بتاع القاهرة بس انا فاكرة ان اخر مرة رحت فيها مكنتش لاقية مكان احط رجلى فيه

وافتكر ان كنت انا واصحابى واقفين حوالين ترابيزة كتب فى نصف الطريق وبعد ماخلصنا لفتنا حواليها لاقينا الزحمة بتلف بينا تانى ومش عارفين نطلع خارج الحلقة المغلقة

قعدنا ساعتها نهزر ونقول هوا الطواف هنا كام لفة؟؟

بس السؤال ليه عدد زوار معرض الكتاب قلوا عن زمان ؟؟

يمكن عشان بقى فى انترنت والناس عندها بديل او بتقدر تنزل الكتب من عليه

ولا يمكن عشان هموم الناس زادت واحتمال يلغوا الدعم فالناس مابقاش عندها دماغ تقرا

ولا يمكن فيضان الاعلام التافه الساقط سفه عقول الناس وخلاها ماتعرفش يعنى ايه قراية

...

الحاجة التاينة الملاحظة فى المعرض ...كم الدقون الكتييييييييييييير هناك

وده طبعا مش سخرية .. لكن انا فعلا استغربت من كم الملتحين هناك ومن كل التوجهات الاسلامية والفكرية

ده حتى الاجانب كانوا ملتحين ... ولحية اسلام مش هزار يعنى

حاجة فعلا جميلة وغريبة ... كانوا فعلا اكتر ناس فى المعرض

هتقولولى اكيد كنتى ماشية فى دور النشر الاسلامية

هقولكم لأ ... بالعكس ده انا حتى ماشتريتش امبارح ولا كتاب دينى

لانهم بيكونوا متوفرين لما المعرض بييجى اسكندرية

تقريبا مابيجيلناش فى اسكندرية الا دور النشر الاسلامية بس

...

طبعا وكالعادة عربيات التبرع بالدم هى علم اساسى ورئيسى من معالم معرض الكتاب من اول ما قالوا يامعرض كتاب

...

وانا فى المعرض لاقيت هوجة كدة وزحمة فى احد دور النشر

وبعدين سألت واحدة هو فى ايييييه ؟؟

قالتلى الشيخ محمد حسان اهو

شايفين الضحكة الطيبة الجميلة

...

كان فى حاجة كدة اول ما شوفتها جابتلى الضغط

كتاب للمفكر جمال البنا ..اسمه "الحجاب" بيتكلم فيه عن ان الحجاب مش فرض وانه شأن خاص للمرأة والخ الخ

ماشى هو حر .. عايز يفكر كدة هو حر .. عايز ينزل كتاب بأفكاره دى هو حر

انما ايه لازمة التماحيييييك

شوفوا الصورة دى وهى متاخدة لظهر الكتاب اللى بيبقى عليه كلمة تعريف بالكتاب

مكتوب فى اخر التعريف

"وتجدر الاشارة الى ان الاستاذ جمال البنا هو شقيق حسن البنا مؤسس جماعة الاخوان المسلمين"

طب ما الناس كلها عارفة انه اخو الامام حسن البنا

ايه بقى لازمة كتابة الجملة فى اخر تقديم الكتاب

يعنى واحد بيتكلم عن الحجاب وواحد تانى بيعرف الكتاب فى ظهره وبيقدملنا جمال افكاره

ايه بقى اللى دخل الوسايط فى الموضوع

لازم يعنى لما اعمل كتاب اقول فى اخره

انا ابن فلان

وابن عم فلان

وجار ابن خالة حماة صاحب فلان

يكونش المقصود يحسبوه على الاخوان

ولا يكونوش قاصدين يسيؤا للبنا والاخوان .. اه ماهو الكتاب بيقولك الحجاب ده دقة قديمة
ناس غريبة والله

...

كان فى حاجة رائعة جدا برضه عاملينها فى المعرض وهى الندوات الثقافية المستمرة طوال اليوم

واول ما تدخل المعرض ومن ع البوابة يدوك خريطة المعرض اللى بجد واضحة جدا ومن غيرها يبقى صباح التوهان فى المعرض

ومعاها تاخد ورقة الندوات ومواعيدها على مدار اليوم

على الساعة 4 قلت اروح اشوف ايه الندوة اللى شغالة وبالمرة ارتاح شوية

لاقيت ندوة بعنوان

"صورة المانيا فى الاعلام المرئى فى مصر على خلفية المسلسل التلفزيونى يتربى فى عزو"

الترجمة : يعنى صورة المانيا فى عين المصريين بعد ما نهال عنبر فى المسلسل قدمت دور الام الالمانية اللى بتربى عيالها بطريقة مختلفة خاااااالص عن الام المصرية (ماما نونا) وبتفكر وبتتعامل بطريقة مختلفة تماما

حضر الندوة الفنان سامح الصريطى وهو احد الممثلين فى المسلسل وبالمناسبة هو شخصية محترمة جدا

وكان بيعقب على الكلام واحدة المانية ..بتقيم الصورة اللى قدمتها نهال عنبر عن الام الالمانية وبتوضح مدى قرب هذه الصورة من الواقع ومدى بعدها

الحقيقة فكرة الندوات اليومية اللى بيعملها المعرض لطيفة جدا وفى ندوات قيمة جدا من الناحية الفكرية

بس قدرى جابنى على الندوة دى .. ياللا مش بطال برضه

وكل سنة ومعرض الكتاب بخير

والحقوا بقى اعملوا زيارة قبل ما فعالياته تخلص يوم الاربعاء الجاى

...

تحديث : الصورة بتاعة الشيخ محمد حسان طلعت للشيخ محمود المصرى

هههههههه معلش العتب ع النظر

...