المشهد
بيتنا والباب مقفول وانا قاعدة عادى بعمل اى حاجة ممكن اى حد يعملها فى هذه الحياة
ترن ترن ترن ترن
انا : مييييييييييييين
صوت ركيك قوى : موش حايسة حاكة ؟؟
ابص من العين السحرية
الاقي
عنين قد النقطة عليهم شعرتين سايحين نايحين وفوقهم جبل شااااهق
يطلق عليه فى بعض المراجع الاجنبية
backpack
أقرر انى أفتح الباب
انا : يا قهلا يا قهلا ...اتفضلى يا انسة
هى : شووكرا
وتقوم هابدة الجبلاية اللى كانت فوقها على الارض وتبدأ تفتحها
وهنا المفاجأة
الجبل تحول الى جراب جحا
وطلعت منه حجات كتيييير .. اشكال والوان ...والوان واشكال
هى وبلغة مصرية اخر دلع : شوفى دى .. طب شوفى دى
مش عايزة ده ... طب جربى ده
بصى ده .... ده كوتن مصرى تاويل التييييلة
انا : نعم ياختى .. مش المفروض انك جايبة الحجات دى من بلدكوا ؟؟؟جبتوا طويل التيلة منين بقاااا
هى بنفس اللهجة المصرية اللى تعقد : ما انتوا ادونا كوتن واحنا نعمله هدوم
انا : الله واحنا مانعملوش بنفسنا ليه ؟؟ هاتى ياختى ده بتاعنا
هى : لازم ادفع فلوس اول
انا : ادفع ده ايه ...ده طويل التيلة ده بتاعنا اساسا
هى : لأ ده بتاعنا ...انا جيبته معى من صين
وفضلت هى تشد وانا اشد
هى تقول لأ دى بتاعتى وانا اقولها لأ دى بتاعتى
لحد ما كانت نيللى هتطلعلنا من البيجاما
..
بيتهيألى دلوقتى فهمتوا الصورة وأكيد كلكوا عدت عليكوا لأن الدلالات الصينى دول بيعدوا على كل البيوت
ماشاء الله مافيش حاجة موقفاهم
مافيش معرض فى اى حتة على ارضك يا مصر ماخدوش فيه بارتيشن ولا اتنين ولا تلاتة ولا عشرة
كل حاجة فى الاسواق مكتوب عليها صنع فى الصين حتى السبح والمصليات
حتى السواك مكتوب عليه صنع فى الصين
كان زمان المنتجات بس اللى فى السوق هى اللى ملطوع عليها الورقة المستفزة بتاعة صنع فى الصين
دلوقتى طوروا نفسهم وبعتولنا دلالات ملطوع على عيونهم الضيقة نفس الماركة المستفزة
يعنى مش هتتعب نفسك فى النزول مع المدام للسوق لشراء المستلزمات
ولا هتتعبى نفسك فى النزول مع صحبتك تلفوا 5 ساعات فى السوق عشان تشتروا حاجتكوا
هى هتجيلكم لحد باب البيت وهتلاقوا نفسكم بتشتروا حجات كتيييييييييييييير
نصها ماكنتوش محتاجينها ...بس رخص الاسعار اللى بتقولها هتغريكوا
وتأثرعليكم تأثيرها السحرى ماركة صنع فى الصين برضه
..
24 comments:
عرفوا من اين يؤكل الكتف
هما عرفوا ازاى يعيشوا وينتجوا ويتقدموا صح
عندنا فيه منهم لاجيئن وليهم مكان ماجرينه وفاتحين محلات او مخازن ليهم
لدرجة انه غلوا الايجارات فى المنطقة عندنا من كتر ما بيدفعوه
ناس بتفكر بجد عارفين السوق المصرى محتاج لايه ودخلوا من خلال هذا الاحتياج
عشان كده نجحوا وزاد انتشارهم فى كل مكان المشكلة الكبرى ان شباب كتير هنا ميقدروش يعملوا او معندهمش هذه الرغبة انهم يلفوا ويسوقوا
بس اكيد برضه الصينين بيبقى ليهم وقع تانى غير اى مندوب بيجيلنا كده
وما زال النيل يجرى
تتخيلي الطيارة اللي كنت رايح بها المغرب كانت مزحومة صينييين
يعني بدأو الهجمة الشرسة على بلاد المغرب العربي ومنها بوابة على غرب افريقيا
ولي عودة
والله طالما حنستورد يبقى الاستيراد من الصين أرحم من أوربا وأمريكا
شخصيا عندما أخير بين منتج صيني وأوربي أختار الصيني
انا متصوره فى عقل بالى ان الصين دى عامله زى المصنع الكبير
وكل سكانها عمال فيه
انا خايفه تطلع مدونات صينى
الصين شعب استطاع ان يستغل كثرة عدده فى ان يغزو العالم
بينما نحن ليل نها نشتكى ونقول عددنا كبير
طب مستغلوناش ليه
الصين شعب استطاع ان يستغل كثرة عدده فى ان يغزو العالم
بينما نحن ليل نها نشتكى ونقول عددنا كبير
طب مستغلوناش ليه
الآن وحصريا علي يلا نفضحهم أخطر قضية تعذيب وانتهاك لحقوق الإنسان في مصر الحاج عبد الله يروي قصته http://www.yallanefdahom2.blogspot.com/
هما بيجو برضه عندكم فى اسكندرية
انا كنت فاكر فى السويس بس والله
لانى لما عشت فى القاهرة مكنتش بشوف كدة
اكيد من كتر انتاجهم مش لاقيين يوزعوه
قالو يوزعوه على الناس الغلابة اللى زينا
ياللا
تحياتى ليكى
هما بس فهموها صح
عرفوا حتي يغزوا أمريكا اللي غزت الدنيا
أمريكا دلوقتي هي كمان بتعاني من الغزو الصيني
و احنا اللي بنبيعلهم القطن
ويرجعوا يجيبوه ملابس
حكومة بتفهم
هنقول ايه؟
حسبنا الله و نعم الوكيل
بس خليكي فاكرة ان احنا كمان بنصدر
بس بنصدر بني ادمين
و قريبا الشغالات المصريات هيغزوا العالم
و مش بعيد يدللوا علي نفسهم كمان
اللهم رحمتك
والله يا مشمش انتي فكرتيني بيوم نزلت فيه مع صحبتي وعجبني تابلوه وبعد ما اشتريته لقيت صحبتي خطفته من ايدي وقعدت تقلب فيه يمين وشمال لغايه لما لقت علامه صنع في الصين ودي اكنها لقت فيتل القنبله
ولقيتها انفجرت فيا شايفه صنع في الصين انا خايفه يجيني عريس وابص الاقي ورقه على قفاه مكتوب عليها صنع في الصين
قلت لها ما تقلقيش اطمني مفيش عرسان الايام دي السلعه الوحيدة اللي تلاقيها شاحه اوي اليومين دول من السوق سواء مصري او صيني
بجد حاجة تجنن يا مشمش وبوست جميل ودمه خفيف زي اللي كاتبه
وطمنيني على البياجاما
تقبل تحياتي ومروري
السلام عليكم ورحمة الله وبركاته
بصراحة هما جدعان
واحنا طبعا لا
قدروا يبعولنا الخيال في الأفلام مش حيقدروا يبعوا شوية ملابس
العيب فينا مش فيهم
ربنا يستر علي ايامنا الجاية
هههههههههههههههههههه عارفه المشكله فى ايه تقولك ماما هاوزة حاجه صينى وتبقى هى اصلا قد امى
انتى معرفتيش مش انا استوردت مرارة من الصين علشان الانتاج المحلى بالسكر بتاعنا الصناعه المصريه يعنى وقعت من الدور التالت رقبتها اتكسرت
امام الجيل
طبعا الصينى له وقع مختلف عن اى مندوب
لانه شكل جديد وطريقة كلام جديدة
ف حتى اللى مش عايز يشترى بيدخلهم عشان يتفرج
__________________________________
أكتب بالرصاص
منمرين على الشرق الاوسط كله يا فندم
______________________________
عصفور المدينة
بالطبع يا استاذنا أرحم بس ده كدة كتييير
يخفوا شوية
_________________________
فرنسا هانم
ههههههههههههههه
تحفة يا فرنسا
والله مش بعيد يعملوها ونلاقى تحت كدة فى اخر المدونة بادج كدة صغنون ومستفز ملطوع عليه "صنع فى الصين"
____________________________
الارهاب المنزلى
الله ينور على حضرتك ..وقال بيقولوا ان عندنا كثافة سكانية
ماشفوش اللى عندهم قفوق المليا عملوا بيهم ايه
__________________________
دوحة
بيتهيألى القاهرة كبيييرة قوى على انتشارهم
بس مش بعيد يحتولها هى كمان .. ما هو الموضوع خطوة خطوة
____________________________
سما الاسلام
هما فعلا قارفين امريكا برضه بمنتجاتهم الرخيييصة
واحنا فعلا نعتبر من الدول المتقدمة فى تصدير الخدمات
يا خيبتنا
_____________________________
قبلة الحياة
هههههههههههههههههههههههههه
هههههههههههههههههههههههههه
صاحبتك دمها خفيف قوى . ولعلمك الصين على ما سمعت هى البلد الوحيدة اللى عندها الرجالة اكتر من الستات
تخيلى دى
يعنى بعد البيجامات هيصدرولنا عرسان وبرضه ملطوع عليهم "صنع فى الصين"
يالا عشان مايبقوش بس حرمونا من حاجة
___________________________
هانى جابر
ده بلا شك يا دكتور ان العيب فينا مش فيهم
هما والله تجار ولاقوا سوق كويس .. مايبيعوش فيه ليه
الرك علينا احنا اللى مش عارفين نعمل السبحة والبيجاما والقلمة الرصاص
________________________
appy
تحفة يا ابى ....
حتى المرارة من الصين
كدة ما بقاش فى اى قطع غيار مصرى
يعنى المدونات والعرسان والمرارة صينى
عماااااار يا مصر
شاطرين اوي الصينيين دول ..عندهم كل حاجة حتي "الكوتن المصري تويل التيلة"ولو عايزة قطن ماليزي طويل التيلة عندهم برضو
بس ماعندهمش رئيس صيني كده يكون مهاود شوية؟؟ اصل اللي عندنا بقي قديم اوي
شقاوة شعب
الصينين مش بيصدروا لينا كل حاجة وبس
لا دول بيصدورولينا بنأدمين كمان يبعولنا اللي هما بيجبوة
ما يشتروا البلد بقى وانعزل احنا احسن
ياخسارة بوابنا مرضاش يدخلهم ..:(:(
بغض النظر عن انهم جايبين منتجات من بلدهم ومعظمها رديئة الصنع وبتبوظ قبل ماتستخدم.. وبنشتريها برده..
لما المنتجات اللى معاهم بتخلص بيروحوا يشتروا منتجات مصرية من تجار الجملة ويبعوها للمصريين على انها صينى ..تخيلوا للدرجة ديه..!!
والكلام ده واثقة منهم والله من شاااااااهد عيان ..ولما شاف النظر ده شال تاجر الجملة وقاله كتير بيشتروا من عندى وبيبيعوا على انه صينى..!!
بيتضحك علينا .. وعامة انا من غيظى حلفت ماما لو جم البيت عندنا ان عرفوا يدخلوا يعنى متشتريش منهم حاااااااااجة..
والله انا باحترم الصين دي احترام غير عادي وبأحترم اهلها اللي فعلا بيدرسوا ويفهموا الناس اللي قدامهم ويبدأوا يتعاملوا معاهم صح
احنا لو اي مندوب مبيعات عدى علينا بنقفل الباب فف وشه قبل مايتكلم وكمان نطلعه حرامي لكن مع الصينيين حاله الامان بتبقى ف اقصى مستوياتها وكمان بنشتري منهم اللي ممكن نشتريه من بره بنص التمن واحسن كمان
الخلاصه ان الناس دي عرفت ان عندنا عقدة الخواجة فاستغلونا صح
موضوعك جامد جدا
وبصراحه المقدمه اللي ف الاول لحد مانيللي ماطلعت كانت خرافه ودمها زي العسل
احييكي بجد
صينى صينى صينى
كلنا كدا عايزيين صينى
تحت الراية الكسورة
مع الاعتذار لحليم
بجد احنا بلد استهلاكى بطريقة غريبة جدا
ممكن يكون بسبب تعداد السكان
وممكن لعدم الترشيد الاستهلاكى
مش عارف
بس اللى اعرفة ان محمد على لما كان ماسك مصر عمل نهضة اقتصادية بالمصريين
يعنى احنا ننفع نعمل نهضة من جديد
بس حتاجين اللى يوجهنا
تحياتى
ناس بتروج منتجاتها ولو فكرتى تعملى الحجات دى هنا هتكون اغلى واردء الموضوع ده ملوش حل انا حاسس انهم بيعملو منتجاتهم بمساعده الجن
عندك حل
تحياتى
لاء
هو انتى بتفتحلهم
أنا بخاف
ومن غير ضحك..ولا تريقة علية
انا بخاف منهم
..كل قصير مكير..
--------
بس ده طبعا لا يمنع انهم مغرقين المنصورة برده
وان بيكون معاهم حاجات كويسة ..على الاقل شكل الغالية ولكن بسعر ارخص
مقارنة طبعا بخدمة التوصيل للمنازل
..بس برده بخاف افتحلهم الباب ..
معلش البوست قديم ويمكن ردى متاخر
بس خلينى اقول انهمو ان كانوا غزو اسواقنا ان صح التعبير
فده مش وحش منهم ده وحش مننا احنا
ضعف مننا
هما حقا متفوقين جدا
وبيشتغلوا ويبذلوا مجهود جبار حقيقى
احنا بقى فين؟
وبنعمل ايه؟
نايمين فى العسل
يبقى نستحمل بقى لدغ النحل
كلمة على جنب كدة
تسلم ايدك
كانت لسه واحدة منهم معدية علينا من قريب...اول ما فتحنلها لاقيناها بتقول عندك عروسة...طبعا دي الكلمة السحرية اللي بيضحكوا بيها على الامات الطيبين اللي مبيصدقوا يشتروا اي حاجة وكل حاجة بحجة اهي تنفع برده...
المشكلة في موضوع الصين ان فعلا كل حاجة بقت صيني...الواحد بيستغرب هما ازاي بيعملوا الحاجات دي كلها...هما عندهم كام ستة اكتوبر وعاشر من رمضان يعني... وبعدين الواحد بيستغرب برده ازاي بيحطوا اسعار قليلة زي دي على المنتجات...احنا عمالين نقول ان الحاجات الصيني مش كويسة وبتبوظ بسرعة لكن ده اسمه اقرع ونزهي...احنا مش عارفين نعمل نص الحاجات اللي بيعملوها وان عملناها بتكون باضعاف التمن اللي بيبعوهلنا بيه
يبقى قبل ما نتكلم ونقول ده صيني و مش حلو نبص الاول احنا بنعمل ايه حول ونتنيل نسكت احسن
abd el-fatta7
اهو ده اللى ناقص نستورد ريس
بس فكرة برضه .. ده حتى الصينى ميزته انه بيبوظ بسرعة وبتجيب غيره
_____________________________
الجمعاوى الاصيل
يالا نعزل ونسيبلهم البلد يبيعوا لنفسهم
بس الخوف يجوا ورانا بلاد الواك الواك
______________________________
3aesha
يا خبر!!؟
ولاد الذين دول ...بيستغفلونا
لاااااااا
هما فاكرينا هبل ولا ايه
حاشا وماشا
_____________________________
ولو
احنا فعلا عندنا نقطة الخواجة
وممكن الناس تدخلهم بس عشان تتفرج عليهم على اساس انهم كائن فضائى غريب ذو عيون ضبقة وشعر سايح
_________________________
محمود الدوح
اه ينفع فعلا نعمل نهضة
بس مش لما يكون عندنا محمد على الاول
_____________________________
ضد الظلم
يكونش فعلا الجن بيساعدهم؟؟
والله ابلغ عنه امن الدولة
___________________________
tamooh
وتخافى ليه يا قمر
دول كميلة خالص وقمة فى الرقة
دى بتقول "حاوسة حاكة" ...شوفتى الرقة
____________________________
ريحانة
براحتك خااالص يا قمر والقديم نجددهولك
وطبعا عندك حق.. هما فى الاول والاخر مجتهدين وبياخدوا نتيجة اجتهادهم
______________________________
yomna
ههههههههههههههه
حلوة قوى كلمة السر
وفعلا الامهات لما يكون عندهم عروسة بيجيبوا اى حاجةوكل حاجة ونفسهم بتبقى مفتوحة للصرف
بصراحة
الذنب مش ذنبهم
الناس فكروا واشتغلوا وعلشان كده نجحوا
الدور والباقي على ال3.5 مليون عاطل اللى مستني الوظيفة الميري
وإن فاتك الميري
اتعلق في ترابه
Post a Comment