Saturday, April 5, 2008

عدنا



انهاردة يبقى مر شهر بالظبط من ساعة اخر بوست كتبته على شقاوة شعب
شهر من اغرب شهور حياتى
شهر من الاحداث المتلاحقة والمؤلمة والمفاجأت والاكتشافات الغريبة
شهر بكيت فيه كتير واحترت كتير واتكلمت كتير وفى نفس الوقت سكت كتير
شهر وصلتنى فيه رسائل كتير ...رسائل بعتتهالى الحياة ..ورسائل تانية ربانية من الله عزوجل
نقلة تانية فى تفكيرى .... ووقفة مع النفس ...ومراجعة لكل احداث الفترة الماضية من حياتى

قبل ما استعرض معاكم جزء من الرسائل اللى وصلتنى ........ عايزة اقولكم يا كل المدونين وياكل المتابعين لشقاوة شعب

بجد وحشتوووونى جدا جدا

ونفسى امر على مدون مدون ومدونة مدونة ارمى السلام واقولهم ان الحياة من غير المدونين ناقصها كتير قوى
وعايزة اقول لمدونتى شقاوة شعب انها وحشتنى بشكل مش طبيعى ...ووحشنى قوى الكتابة فى صفحة كرييت بوست
ووحشنى قوى باسوورد المدونة اللى مش بكتبه غير وانا داخلاها
ووحشتنى قوى تعليقات الناس وردودى عليهم

مش عارفة ازاى قدرت اعيش الفترة اللى فاتت من غير شقاوة شعب
وهى الحياة ايه غير شقاوة شعب

بالمناسبة ....... بكرة شعب مصر هيتشاقى شقاوة كبيييرة قوى ماجربهاش قبل كدة
اضرااااااب .... سيدى يا سيدى على شعب مصر اما يتحرك ...مارد ان شاء الله
وبمالناسبة برضه عايزة اشكر كل الناس اللى علقت فى بوست
"كم هو مؤلم ذلك الألم"
وبجد تعليقاتكم غالية عليا قوى



تعالوا بقى نرجع للرسايل وناخدها كدة رسالة رسالة

الرسالة الأولى

احيانا بنتعامل مع الله عزوجل من منطلق "هو انا مش من حقى كذا كذا" وكأنه حق مكتسب
ومش واخدين بالنا ان لو ربنا سبحانه وتعالى عاملنا على اساس الحق والمستحق هنضيع لان ذنوبنا فى حقه "عزوجل" كفيلة باننا نروح ورا الشمس وكفيلة باننا مايكونش لينا اى خير عنده -سبحانه وتعالى
لكن لما بنتعامل معاه من منطلق الامل فى رحمته .... بنلاقيها اوسع مما نتخيل


الرسالة التانية

قد ايييييه الدنيا دى صغيرة
صغيرة قوى قوى لدرجة تخنق ....ومافيش حاجة فيها بتستخبى
فاللى هيكذب مسير الدنيا تلف تلف وكذبته تبان ...بأى طريقة مباشرة او غير مباشرة
ودى مش حاجة حلوة ابدا ابدا ........ اقصد صغر الدنيا
لان احيانا بنتمنى اننا مانكتشفش كدب اللى حوالينا .... لأن يمكن الكدبة طعمها حلو
يا خساااارة


الرسالة الثالثة
الناس الاكثر إبهارا ...... هم الاكثر قدرة على اخفاء عيوبهم
يعنى فى الناس بنقابلهم فى الدنيا ....يااااااه ....نجوم
الناس دول مستحيل مايكونش عندهم عيوب ..لكن الفرق بينهم وبين غيرهم انهم بيقدروا يداروا عيوبهم
اما التانيين فعيوبهم باينة عليهم و بالتالى مالهمش بريق ولمعان
وعشان كدة صدمتنا بتبقى كبيرة فى "النجوم" دول عن الناس التانية


الرسالة الرابعة

مافيش حد سوى نفسيا مية فى المية
طالما عاش فى وسط مجتمع وبيئة وحكمته ظروف واحداث ... يبقى اكيد اثرت على نفسيته ايجابا فى جزء وسلبا فى جزء تانى
وبالتالى داخل كل منا كلاكيع وفيونكات غريبة الشكل والمضمون ...يمكن مش باينة ومش عارفينها لان ماجاش الحدث اللى يظهرها على السطح
لكن اول مابيجى الحدث المناسب ...اللى ممكن مايجيش الا بعد سنين طويلة من عمر الانسان
ساعتها هتتجلى بوضوح فيونكاته الكامنة فى صميم ونغاشيش عقله



الرسالة الخامسة

ربنا عارفنا
اه والله عارفنا ....وعارفنا اكتر من نفسنا
احيانا بيتهيألنا اننا عايزين حاجة قوى قوى ....بس ربنا عارف اننا فى حاجة تانية عايزينها اكتر بس مش واخدين بالنا لانها
الحاجة التانية - لسا ماظهرتش فى حياتنا
بس ربنا بقى علام الغيوب ...عارف اللى جاى ...وبالتالى عارف ساعتها هيكون ايه اختيارنا
عشان كدة مانفذش طلبنا فى ساعتها لانه -سبحانه وتعالى- عارف رغباتنا اكتر منا



اظنكم دلوقتى بتقولوا ايه الطلاسم دى ...وهى ايه الحكاية بالظبط
لكن اللى طالباه المرادى ان ماحدش يخمن
اه ماحدش يقول فى باله ...واضح كدة ان القصة هى كذا كذا
لانى ببساطة هقوله غلط
المهم ....ومن غير مانقول القصة ايه ...حاولوا تاخدوا الكام رسالة دول تحفظوهم فى عقلكم وقلبكم
ومسير الايام تمر وتثبتلكم انها كانت رسائل فى الجون

ووحشتونا


..

28 comments:

امام الجيل said...

جميل
هو اكيد طبعا فيه فرق بين ان الواحد يقرا رسايل وان الواحد يعيشها

ايه ده صحيح اهلا بحضرتك ورجوعك
:)
باردوون

لما الواحد يعيش الرسايل ويتعجن منها بيحفظها اوى
بس نعمة كبيرة اوى على فكرة ان الواحد يشوف الرسايل اصلا
فيه ناس بتمر برسايل واضحة وجلية وخطيرة
ومش بتاخد بالها منها ابدا

ومش بيتعلموا منها اكيد طالما مخدوش بالهم منها

بس اكتر رسالة عايشها ان فعلا ربنا عارفنا اوى اكتر من نفسنا بكتير
وعارف الاصلح لنا وبيحبنا اكتر من حبنا لانفسنا
سبحان الله

appy said...

حمد لله على السلامه

يا استاذه يا شقيه انتى
ايه اخبارتك حلوة الرسايل بس عاوزة اعرف معناها مليش دعوة
نورتى بلوج سبوت تانى

3ala asm masr said...

من غير ما الايام تمر واجى اقولك انها فى الجون انا بقولك من دلوقتى انها فى الجون لانى جربت التلاته الاولانين وفى الجون فعلا
انتى كمان وحشتينا والله وحمد الله عالسلامه

tamooh said...

ايوة كده
ورينا شقاوتك
و الرسايل الحلوة دى

وحشتينااااااااا كلنا

واكتبى

ودايما

:)
واوعى تحرمينا من تجاربك

مدونة لحن الغروب said...

.من الحياة ماقتل ومن الحياة مامنة نتعلم اتمني ان تكوني كالجبل الراسخ تحاربة الريح والعواصف فتنتهي الريح وتذهب العواصف ويبقي الحبل راسخا قويا ابراهيم
مدونة لحن الغروب
اتمني منك الزيارة لمدونتي
anaabnalikwan.blogspot.com

Anonymous said...

من الحياة ماقتل ومن الحياة مامنة نتعلم اتمني ان تكوني كالجبل الراسخ تحاربة الريح والعواصف فتنتهي الريح وتذهب العواصف ويبقي الحبل راسخا قويا ابراهيم
مدونة لحن الغروب
اتمني منك الزيارة لمدونتي
anaabnalikwan.blogspot.com

محمد عبد القوى said...

أولا حمد لله على السلامة
ثانيا: انا والله ما كنت ناوى اخمن اى موضوع من ورا الرسايل ..لأن اى محاولة لأخراج الرسايل من نطاقها العام ووضعها فى نطاق خاص هيقلل من روعتها
دا طبعا مع احترامى لحياتك ومشاكلك الخاصة اللى وصلتك للرسايل دي عشان تديها لنا وتراهنى عليها انها فى الجون
لا ياستى ،احنا عارفين انها فى الجون من دلوقت
بوست رائع
:)

عمر الشرقاوى said...

الف حمد لله على الثلامه بجد انتى اللى وحشتينا

عمر المصرى said...

السلام عليكم
حمد الله على السلامة
ورسايل جميلة وعرضك لها رائع
تحياتى

صوت من مصر said...

حمد لله على السلامه يا جاى من السفر وحشانا الابتسامه
؟

خبيب said...

رسائل واقعية وصادقة جدا

---

وخاصة :

"وبالتالى داخل كل منا كلاكيع وفيونكات غريبة الشكل والمضمون "

هههههههههه

---

فعلا

---

حمدا لله على السلامة

شقاوة شعب said...

امام الجيل

دى تبقى حاجة صعبة قوى لو عشنا الرسايل وماتعلمناش منها

وحضرتك اللى اهلا بيك دايما
_________________________________

appy

ليه كدة بس يا آبى السياح ده
يعنى لازم الفضايح على النت والفضائيات ؟؟
هبقى اقولك بينى وبينك فى ذات يوم من ذات الايام
_________________________________

3la asm masr

جربتى التلاتة الاولانيين ؟؟ طب تمام تمام
المهم تكونى اتعلمتى منهم
وانتى كمان وحشتينى
____________________________

tamooh

ماتستفزيش عنصر الشقاوة جوايا
هو كدة كدة هيطلع لوحده ان شاء الله
منورة يا قلبى
______________________________

لحن الغروب

الحياة مجموعة من الاحداث الحلوة والاحداث اللى مش حلوة
وفى الحالتين الحياة لا تتوقف بل مستمرة
وعشان كدة لازم لما تيجى الريح ننحنى ونخليها تعدى ونقوم تانى
عادى يعنى
نسأل الله الثبات على الامر
_______________________________

محمد عبد القوى

جزاك الله خيرا ...وحتى يعنى لو خمنت ...احنا تحت امرك
_______________________________

عمر الشرقاوى

الله يثلمك يا فندم
_______________________________

عمر المصرى

الله يسلمك ... ويارب تقع فى نفوسكم وقع الفائدة
________________________________

صوت من مصر

ههههههه انا لسا فى البلد دى بعافر معاها وبتعافر معايا
______________________________

خبيب

الله يسلمك
ودى حقيقة فعلا شفتها بأم عينى الفترة اللى فاتت فى اكتر من شخص

أختكم فى الله said...

الرسايل واضحة جدا جدا يمكن يكون كل واحد فينا مر بموقف اتضحله بعديه صحة الرسايل اللى قولتيها دى بس الحدق اللى يقرا ويفهم
أتمنى ان المشاكل اللى كانت عندك دى تكون مرت بسلام ومتزعليش نفسك ابدا كله بيعدى

raspoutine said...

بعد حمد لله على السلامة
فعلا رسايل زى ما قولتى فى الجون

تحياتى

Hosam Yahia حسام يحى said...

اهلا بعودتك الى بيتك

الرسايل دى حلوه كتير كتير :)

أنا وصاحبى said...

اعتقد ان الرسائل كانت اكثر وضوحاً ونضجاً وانت تعيشيها
عجبنى جدا شعور حضرتك تجاه المدونين
دمتى بخير

صيحة حق said...

اقرأوا على مدونة :-صيحة حق الشيخ ماهر عقل يعلمنا حيا وميتا http://salahshnan70.blogspot.com/2008/04/blog-post_10.html

الفاتح الجعفري said...

السلام عليكم
بوست رائع فعلا
ورسائل قويه واكثر مااعجبني اول رساله وخامس رساله
فعلا نحن نتعامل مع الله الملك الحق بمنطق غريب جدا
تذكرت قول الله تعالي
وماقدروا الله حق قدره
اللهم انا نسألك العفو والعافيه في الدنيا والاخرة
جزاكم الله خير

فزلوكة said...

بداية
وإنتى كمان وحشتينا جدا

أما الرسايل فبجد جامدة وصح
وأكتر حاجة عجبتنى هى صدمة النجوم
بجد بتبقى صعبة لأنها غير متوقعة

أما تأليف القصص والروايات
فأنا ألفت كام قصة على الرسايل دى جامدين بجد!!!!!!!!!!!!!؟

ابوجلال المصرى said...

السلام عليكم
اولا تحياتي لصحبه هذه لمدونه لجميله .. وثانيه .. بدل متروحي لمدونه مدونه وتسلمي عليهم هما هيجو ا بنفسهم
وثالثا دى اول زياره لمدونتك الجميله .. وان شاء لله ما تكنش الاخيره ... وبجد عجبتني مدونتك .. وشكرا والسلام

son's egypt said...

السلام عليكم
ربنا يكرمك فعلا علي الرسائل الهامة جدا
فعلا ربنا سبحانه وتعالي مطلع علي كل شئ فينا
وعلي كل واحد نفسه في ايه وبيفكر في ايه

منة الله said...

اولا عودا حميدا

رسائلك غاية في الروعة

لمست قلبي منها رسالة العيوب و اخفائها

ذكرتني بالحكمة الرائعة

" يمتدحنا الناس بقدر ستر الله علينا "

dina said...

الله يا شيماء
بجد انتى كمان وحشتينا جدا انما ما شاء الله راجعة ببوست يجنن بجد و مليان بالاحاسيس و المرة دى رسايل ربانية كمان...انا فعلا كنت محتاجة اقرا البوست دا اوىىىى خصوصا اخر رسالة
بجد انا استفدت
مرسى يا شيمو

mohammed alsha3r said...

عودا حميدا

شقاوة شعب said...

اختكم فى الله

جزاكى الله خيرا حبيبتى ..واحلى حاجة قلتيها هى انه كله بيعدى
وده شعار انا مؤمنة بيه من زماااااااان
____________________________

raspoutine

الله يسلمك ... ونورت المدونة
________________________________

حسام يحيى

جزاك الله خيرا ... ومنور البيت - المدونة مجازا
_________________________________

انا وصاحبى

دى كانت اكثر وضوحا وتغلغلا ورسوخا فى عقلى
واهلا بيك دايما
_________________________________

الفاتح الجعفرى

من ساعة ما حضرتك كتبت وماقدروا الله حق قدره فى التعليق وانا كل شوية افتكرها وتوجعنى قوى
جزاك الله خيرا على التذكرة
_________________________________

فزلوكة

ايه ؟؟الفتى عليهم قصص ؟؟
طب ورينا يا جميل ..بجد هتبقى حاجة رائعة لان القصة بتبقى زى المثال ..بتثبت المعلومة النظرية جدا جدا

شقاوة شعب said...

ابو جلال المصرى

حضرتك فعلا نورت المدونة ... بس برضه لازم افوت واسلم
يعنى هما يتعبوا نفسهم وياخدوا تاكسى لحد شقاوة شعب ..وانا مارحلهمش ؟؟
ماتجيش ابدا
______________________________

son's Egypt

ده حقيقي مية فى المية ... ماهو العليم الخبير- سبحانه وتعالى
_______________________________

منة الله

حلوة قوى الحكمة دى ...انا اول مرة اسمعها .. بس فى نفس الوقت توجع قوى
نورتى يا منة
________________________________

dina

انتى كمان وحشتينى قوى يا دينا
وفرحانة قوى بتعليقك وان الرسائل لمست قلبك
_________________________________

mohammed alsha3r

الله يسلمك

أختكم فى الله said...

إنتى يا حبيبتى من اول الناس اللى شرفوا مدونتى ونصايحك الغالية انا بعمل بيها
أدعوكى لزيارة مدونتى لقراءة موضوع
[خبرات على أدنا] وياريت تشرفينى بترك خبرتك
www.for-a-happier-life.blogspot.com

will said...
This comment has been removed by a blog administrator.