Sunday, April 13, 2008

الى زميلى من الحزب الوطنى




ليا زميل دراسة ينتمى الى الحزب الوطنى ..وهو راجل أكبر منى فى السن بحوالى عشرين عام وماتستغربوش لأن الدراسات العليا فيها كل الاعمار
وفى يوم سألنا الدكتور المحاضر :
تعرفوا ايه هى نشأة الحزب الوطنى ؟؟
وطبعا السؤال موجه بشكل خاص لزميلنا ده لاننا كلنا عارفين انه من كبارات الحزب
فأجاب الزميل بكل ثقة :
اه طبعا ... الحزب الوطنى اللى هو كان زمان الحزب الوطنى بتاع الزعيم مصطفى كامل
وهنا وقع الجميع بما فيهم الدكتور فى الضحك ... فالعضو الكبير بالحزب الوطنى مايعرفش تاريخ حزبه .. ويربطه بالحزب الوطنى اللى أسسه مصطفى كامل فى عام 1907
وبعدين الدكتورعاد السؤال :
ها ياجماعة .. مين يعرف ؟؟
فأجاب احد الزملاء "صاحب توجه اسلامى" بأن الحزب الوطنى اللى موجود حاليا هو فى حقيقته حزب مصر العربى الاشتراكى اللى أنشأ فى 1978 لما اتفتح باب تأسيس الأحزاب فى الوقت ده ..وبعد كدة اتغير اسمه الى الحزب الوطنى الديمقراطى
فكانت اجابة سليمة صدق عليها الدكتور والعديد من الزملاء

قبل ما اقٌولكم واحدة "هل تعلم " هقولكم ان زميلنا من الحزب الوطنى لوجت محاضرة بتتكلم عن تاريخ فلسيطن من الناحية السياسية ...تلاقيه يقول فى تذمر بصوت مسموع : احنا مالنا احنا بس ومال فلسطيييييين ؟؟لو بدات مناقشة بين الزملاء واحد المحاضرين عن الأوضاع السياسية الحالية تلاقيه يقول : انتوا هتنخنقونا ليييييييييه ؟؟
ولو جت سيرة اى موضوع سياسيى ...لازم تلاقيه متذمر ومضايق ...مش عارفة طب جاى على نفسه وبيدرس ليه ؟؟

هل تعلم
هل تعلم ان هذا الزميل هو احد نواب المجلس المحلى عن الحزب الوطنى اللى فازوا بالتزكية فى الانتخابات اللى كانت من كام يوم؟؟
هل تعلم ان هذا الزميل رايح يحلف اليمين يوم الاربعاء القادم ؟؟
حد يقولى ده بقى هيحلف على ايييييييييييه ؟؟

موقف اخر
الدكتور بيتكلم وبيناقش الاوضاع الراهنة ...فمن غيظه غلط فى الذات الحزبية الوطنية الديمقراطية
واحتراما لوجود ذلك الزميل قاله بهزار :
اوعك تكون زعلان يا استاذ ...... ء
رد الزميل قائلا : لا ولا يمهمك يا بيه .... النظام قوى ومستمر

وهنا ارد انا بقى على الزميل بكام قصة وحكاية صغيرة ... تثبت عكس نظرية " النظام قوى ومستمر" ء

فرعون


إن فرعون وهامان وجنودهما كانوا خاطئين -- سورة القصص 8
وبالتالى لم يستثنى الجنود من العذاب
ولم يستثنى الجنود اللى قالوا : انا عبد المأمور
ولم يسلم هامان من نفس النهاية المؤلمة لسيده ... لأنه مشى على خطاه واقتفى أثره وسار على منهجه الظالم ...فكانت النتيجة واحدة


السادات


ظلم وتجبر واعتقل وقتل وخاصة فى اخر ايامه
وسب أحد علماء الدين الكبار علنا فى تسجيل مصور
ثم ماذا كانت النتيجة ؟؟ النتيجة جاءت من بين صفوف جيشه

شارون


المخ اللى دبر وخطط وحاك المؤامرات والحروب جاتله جلطة .. تطورت الجلطة الى شلل تام فى الأطراف وصل للجفون
تطور الأمر الى جسد يتعفن رغم ان صاحبه مازال على قيد الحياة


حمزة البسيونى وصلاح نصر
اثنين من زبانية عبد الناصر .... لو حكينا على قصص تعذيبهم للمعتقلين فى سجون عبد الناصر ستقشعر الأبدان وتدمع العيون
حمزة البسيوني بلغ به التجبر والطغيان إلى حد أنه كان بيقول للمعتقلين من اصحاب التوجهات الاسلامية وهو بيعذبهم حينما يستغيثون بالله : فين الهكم ده عشان أحطه في الحديد !!!!! ء
حمزة البسيوني وهو خارج من القاهرة إلى الإسكندرية خبطت عربيته فى شاحنة شايلة حديد فدخل الحديد في جسمه، من أعلى رأسه إلى أحشائه، وماقدروش يطلعوه إلا حتت

أما صلاح نصرفجاتله أكثر من عشرة أمراض مؤلمة، مزمنة ولم يجد له الطب علاج ، لحد ما مات سجين في زنـزانات زعمائه اللى كان بيخدمهم
"إن الله ليملي للظالم، حتى إذا أخذه لم يفلته" حديث



أبو جهل
أكثر من آذى النبى صلى الله عليه وسلم وكاد للاسلام والمسلمين.... وهو اللى سماه النبى صلى الله عليه وسلم "فرعون هذه الأمة " أى أمة الاسلام
وفى غزوة بدر جاء صبيان صغيران لسيدنا عبد الرحمن ابن عوف وقالوا له : ياعم اين ابو جهل فاننا سمعنا انه سب رسول الله وقالت لنا أمنا لا تعودا إلا وقد قتلتماه
استغرب سيدنا عبد الرحمن ابن عوف من الصبيين لكنه شاورلهم على ابوجهل
فانطلقوا كالسهام لحد ما وصلوله وضربوه ضربة رجل واحد


صدام

اللى ماكانش حد يقدر يتنفس فى بلده ولا يقول كلمة ولا يعبر عن رأيه
اللى كان بيبوس رجل الأمريكان ..اللى عمل كل حاجة عشان يرضيهم ومرمط شعبه فى حروب مالهاش اول من اخر
هما اللى قتلوه وأعدموه فى يوم عيده



موسوليني


صاحب النظرية الفاشية التى تمجد الأمة –بتطرف- على حساب كل الأفراد
اعدم مع اعوانه السبعة عشر في ميدان "دونجو" بميلانو على ايد الشعب الايطالي عام 1945




ستالين


الدكتاتور صاحب القبضة الأمنية التى لم يكن لها مثيل
وزيره "بيريا" حطله سم فى العشا وبعدها بأربع ايام مات فى مارس 1953



كل القصص والنهايات اللى قلتها لأقول لزميلى من الحزب الوطنى انه ليس من باب الشماتة
وانما من باب : "فذكر فان الذكرى تنفع المؤمنين" ء
ولأقول له ايضا

أن نظامك ليس قوي .. ولن يستمر

ان شاء الله ... وهذه سنة الله فى الأرض وفى الأمم
..

46 comments:

ابوجلال المصرى said...

السلام عليكم
المدونه المكافحه شقاوة شعب
تحياتي ..
موضوع جميل يحمل معني تربويه جميله بس الي بالى بالك ... فى نوم عن الكلام ده
لكن ربك ليس لا يغفل مثقال ذره ... وليهم يوم ...
والسلام

فرنسا هانم said...

حبيبتى الغاليه شيماء
الف حمد لله على السلامه
حلوه التذكره دى
وياريت كل المفسدين يعرفوا ان دى نهايه كل ظالم

shaimaa samir said...

حلوة جداااااااااااا
هو بيدرس ايه بالمناسبة...؟؟
هو لسه اساسا بيتعلم ..؟؟
وموضوع حلف اليمين يوم الاربع ده وجعنى اوى
لا حول ولا قوة الا بالله

عامة نسال الله ان يرحمنا
ويستعملنا ولا يستبدلنا

ويرينا فى كل الظالمين يومااسودا

جزيت الخير

محمد فوزي said...

يا جماعه اسمحولي بس انا هاقول كلام ممكن يكون مختلف شويه وارجو ان يتسع صدركم ليه وتفكروا في مقاصده قبل ما حد يهاجمني ,
انا طبعا متفق معاكم تماما ان البلد في حاله سيئه وانها لا يجب أن تصل الى هذا التدني الاقتصادي والخدمي والاخلاقي لكن سؤال بس صغير كده : احنا عايزين تغيير لكن حد عنده تصور عن ماهية هذا التغيير ؟
يعني بطريقه تانيه حد مننا( كشعب يعني) أفراد وأحزاب ومؤسسات عنده خطه منهجيه للسيطره على الموقف العام ومن ثم التقدم بالبلد في حالة حدوث هذا التغيير ؟ طب حد يقدر يقوللي التغيير ده ممكن يحصل ازاي طيب بالضبط؟
تاني , انا موافق تماما على ضرورة احداث تقدم واعمار لمصر , مع الديمقراطيه ومع ان تتحرر البلد من القبضه الأمنيه الخانقه بس انا ضد الفوضى وضد التغيير الغير مدروس وضد ان احنا نبقى بنتكلم كده في الهجايص واهو هنغير وخلاص!!!
يا جماعه الأمثله مؤلمه وهاخد من البوست نفسه حد ممكن يقوللي بأمانه العراق بعد (الدكتاتور) صدام أحسن ولا أسوا بمليون مره , لو اللي قتلوا الرئيس السادات كانوا على صواب وحق يبقى ليه النتايج أفرزت الحاله اللي احنا فيها دي ومش عاجبانا, حد ينكر ان الثوره لما قامت الكل هلل في الأول وبعدين رجعت الناس تشتكي من الظلم والجور والتعذيب , طب ايه اللي اتغير وليه دايما بنكرر نفسنا ؟ خلونا مره نفكر احنا عايزين ايه؟ خلونا مره نفكر نعالج نفسنا وأخطائنا قبل ما نتكلم كلام كبير محدش فاهم أزاي يحوله لواقع ..مش كده ولا اييييييه؟

خايف من الحقيقة said...

طيب حضرتك كتبت الكلام ده لمين اذا كان اعضاء الحزن الوطني مبيعرفوش يقروا

عمر أفندى و أبووه said...

تسلم ايديك يا شيماء موضوع تحفة

و بما انى فى السودان الشقيق دلوقتى و مبشتكيش من رغيف العيش المصرى و لكن بستكى من الرغيف الفينو السودانى اللى اربعة منه بجنيه سودانى اى ما يعادل 3 جنيه مصرى....

و بما انى مبتبهدلشى من الامن المصرى و الحمد الله ولا بتسحل فى الشوارع نظرا لانى هنا فى بلد الامن و الامان التحتانى (السودانى الشقيق)
و موش عايش فى مصر و نظرتى اكيد هتبقى دنيوية محدودية وحدوية انانية بحتة

فانا بنادى من هذا المنبر على مديرى انه يحاول يقرا مقالك و يعرف ان كل ظالم و له نهاية

ربنا ياخده و مع حسنى مبارك بالمرة ...

امام الجيل said...

جميل
اكرمك الله على هذه الحفنة من الزعماء
ومن قيل فى عهدهم انهم عظماء

حقا العظمة لله وحده
واذا رفع قدر اى بشر فى هذه الدنيا
فانه يسقط احيانا ويرتفع اخرى

اول مرة اعرف ان الحزب الوطنى ليه اعضاء :)
وليهم فكر وحركات وكده

ويدافعوا عنها
سبحان الله
ربنا يعذينا من هذا
ويهدى الجميع للحق
اللهم امين

HoNdA said...

ههههههههههههههههههههههههههههههههههههههه
لا حول ولا قوة الا بالله عادى يابنتى عادى كل حزب فيه الفالح والتانحححح جايه من تناحه
ربنا يهدى ويهد

عاليا حليم said...

كثير للأسف من المثقفين و الوطنيين و المحموقين و ماتعرفيش هم محموقين على ايه بننصدم لما نكتشف انهم مدعين و جاهلين بما ينادوا به

و احييك بجد على كل الامثلة الى استشهدتى به فى فناء اى حكم ظالم

بس صورة شارون انتى متاكدة انها حقيقة مش مفبركة فيديو؟ .. أصله شكله فيها غريب اوى حاجة لا يصدقها عقل

و ع العموم ربنا قادر على كل شئ

تحياتى على البوست الأكثر من رأئع

شقاوة شعب said...

ابو جلال المصرى

خليهم نايمين .... نامت عليهم حيطة
بس ده لايمنع ان فى ناس من الحزب بدأت تفوق ... وده بان قوى ايام انتخابات المحليات
________________________________

فرنسا هانم

ربنا يخليكى يا فرنسا ... والتذكرة فعلا لكل ظالم مش للحزب بس
________________________________

shaimaa samir

اهلا اهلا يا شيمو
منورة المدونة
معلش بقى الراجل قرر انه يتعلم ... المهم يتعلم ...ده على طول مضايق من كل محاضرة ومن كل موضوع ... طب ماتروح يا عمو ..مافيش حد هيضربك على ايدك عشان تقعد________________________________


محمد فوزى

منور المدونة .. وبجد شكرا جد على المشاركة الفعالة دى
فى النصف الأول من مشاركاتك طالبت الناس والشعب ان حد فيهم يكون عنده منهجية تغيير
وردى عليك : هو ان ده مش مطلوب اصلا من الشعب .. مش ده دوره
مش دورى ان اظبط المنهج التعليمى فى البلد ... ولا دورى اقترح على الحكومة خطة خمسية للنهوض بالاقتصاد ولا دورى ادعبس على مواطن الفساد واكشفه واجازيه
مش دورى ولا دور اى مواطن
ده دور الحكومة
اما دورى ودور عضو مجلس الشعب ودور اى مواطن انه يطالب بحقه
ويطالب الحكومة انها تقوم بدورها ...اللى هى الاعمال اللى قلناها فوق ... وده اللى احنا بنعمله

النصف الثانى من تعليقك طالبت فيه بالتغيير المدروس المتخططله صح
ودى معاك تماما فيها

الجزء التالث من تعليقك عرضت فيه امثلة دكتاتوريين وبعدهم عمت الفوضى

فى مثال صدام عندك حق الوضع فى موجوده كان احسن وبعده الدنيا باظت ...ليييييييييه ؟؟
لان فى احتلال هو اللى بوظ الدنيا
طيب لو كان صدام لسا عايش ومافيش احتلال ..كان المفروض بقى العراقيين يقعدوا فى بيتهم ويرضوا بنصيبهم ويقولو اللى نعرفهم احسن من اللى مانعرفوش ... مش كدة ؟؟
ولا يعارضوه فى كلمة ولا يطالبوا بحقوقهم ولا حريتهم بشكلها الواسع ولا اى حاجة

وبعدين فى امثلة كتيييير جدا لبلاد كان فيها دكتاتوريين وفضل شعبها يناضل لحد ما البلد حكمها ناس "مدنيين" هما راضيين عنهم
وبدأت بلادهم تتطور فى كل المجالات لحد مابقت من الدول "المتقدمة " ..هتيجى علينا احنا ونسكت ونقعد فى البيت نستنى الفرج ؟؟

وبالله عليكم ماحدش يقولى نظرية : مين البديل
عشان النظرية دى بتجننى .. يعنى بلد فيها تمانين مليون مافيهاش حد يقدر يحكم الا مبارك ؟؟
دى تبقى بلد خايفة وتستاهل كل اللى يجرالها
ودى مش مصر
مصر فيها قدرات سياسية كبيرة ..مفكريين كبار .زعلماء جهابذة ..لكن مش مسلط عليهم الضوء عمدا وقصدا عشان مايتحولوش لزعماء شعبيين ينافسوا الحاكم او يهزوا عرشه

مش كدة ولا اييييييه ؟؟

شقاوة شعب said...

خايف من الحقيقة

ههههههههههههههههههههه
يمكن يجيب حد يقراله
____________________________

عم أفندى وابوه

مديرك لو جه يقرا لمقال هيقرا التعليقات وهتروح ورا الشمس ... وده المكان المفضل لكل الظالمين يبعتوا فيها الناس اللى بيضايقوهم وبيعكننوا عليهم
بس ماتقلقش هتلاقى هناك صحبة حلوة قوى

وسلملى على كل السودانيين
_______________________________

امام الجيل

ليهم حركات اه ...انما فكر لأ
ودى أبصم عليها بالعشرة
_______________________________

honda

والتتالح ؟؟
ههههههههههههههههههه
_________________________________

عاليا حليم

لأ هو جماله انه لوا بيدعى الثقافة ولا بيدعى اى حاجة .... هو تقريبا حد حلف عليه ليعمل الدراسة دى فعملها
بس مش أكتر
اما صورة شارون فبصراحة هى من النت ..وبيتهيألى انها صادقة
ما خلاص ادود اكل فى جسمه وشبع ... سبحان الله ..عمرك شفتى انسان الدود بياكله وهو لسا حى ؟؟؟

محمد فوزي said...

كلام جميل ومثير للتفكير ويحفز للاستمرار في الحوار , ....
ما تيجي نضرب امثله :
ابليس ربنا خلقه للغوايه , رجيم ولعين طب ايه الحل معاه؟ الحل معاه ان الإنسان يرفض غوايته , يتحداه يبقى أقوى منه ..... طب ينفع ان احنا كلنا ندعي ربنا انه يهدي ابليس أو ان ابليس يتحسن شويه لأ ميننفعش! لكن ممكن لما نبقى زي ما ربنا عايزنا ساعتها يصبح لا سلطان لإبليس علينا
الأواني المستطرقه , مجموعه من الأواني الطوليه المتوازيه المختلفة في الطول والعرض ترتكز جميعها على انبوب آخر عرضي , إذا صب أحد الأشخاص سائل في أي انبوب طولي سيسري السائل إلى بقية الأنابيب ويرتفع فيها بالتساوي , لكن لو حدث إنسداد في أي جزء من أجزاء الأنبوب العرضي فلن يستطيع السائل أن يرتفع في أي أنبوب وسيرجع من حيث أتى , المواطن الشريف هو ذلك الأنبوب العرضي و مصر تمثل الأنابيب الطوليه إذا المواطن قوى ومنيع فلن يستطيع أحد أن يصب له سائل الفساد وإذا حدث لن يرتفع السائل سنتيمتر واحد
يا أستاذتي الفاضله الحكام الأجانب مبيظلموش مش لأنهم مبيحبوش الظلم إنما لأن اللعيبه بتاعتهم من النوع اللي ميتظلمش , ميتقهرش
النضال من وجهة نظري ان كل واحد في موقعه يقف ويبقى سد الفساد لا يخترقه ويحاول يقوي اللي جنبه أو يحمر عينه للي ناوي يفسد عشان نبقى شعب ميتقهرش و مين قال ان المواطن مش عليه كشف الفساد , مين اللي قال ان المتعلم ميعلمش الجاهل , يا جماعه
أي شىء بسيط بيفرق إنما احنا عايزين نغير أي حاجه إلا نفسنا
هانقعد نهاتي , ونعمل مظاهرات وإضرابات ونقول الحكومه لازم تغور والحزب لازم يمشي واحنا على حالنا يبقى الحزب هيقولنا زي أحمد حلمي ما قال لمنى زكي (مش مااشيييي )

محمد فوزي said...

طب وإذا مشي ( معلهش انا ممل شويه) يمشي إذاي ؟
ثورة يوليو جديده ؟ طب انا أعشق شخصية عبد الناصر , لكن في غيري بيموت من مجرد سماع إسمه , يبقى مينفعش ندي الحق لمجموعة أفراد انهم يدعوا احتكار الصواب ويعملوا اللي هما شايفينه صح لأن ممكن يتضح بعدين انه غلط
اللجوء الى الشيطان الأكبر أمريكا والإستنجاد بها وأخذ الأوسمه من مؤسساساتها وأنظمتها على أساس إن احنا ناشطين في مجال حقوق الإنسان والديمقراطيه يبقى يا اما احنا عملاء يا هبل وبنشرب المقلب وعايزين بلدنا تبقى عراق جديد
والأفاضل الشخصيات الفذه اللي انا وانتي نفسنا تمسك البلد لو مش هتوصل بثوره هتوصل إذاي من خلال الآليات الموجوده ؟
يبقى لازم نبدأ بأنفسنا , نعمل بطاقه انتخابيه وننتخب على أساس سليم وإذا حد منعنا نلجأ للنيابه العامه ونحاول نمحو الأميه من الناس القريبه لدايرة وجودنا ونشتغل بذمه ونرفض الفساد اللي انا هستفيد منه قبل اللي انا هتضرر منه , ونرجع الفريضه الغائبه الزكاااااااااه واظن انا قولت حاجات عمليه اهو عشان ميبقاش كلام نظري
وأظن ان انا غلست قوي

Zika said...

اولا بحييكي علي مواضيعك في المدونه كلها انا تقريبا بقالي هنا كتير اوي ودي مش عادتي بس مدونتك رائعه بجد
اما بالنسبه للاستاذ زميلك فهو بيمثل تقريبا نص او تلت تربع اعضاء الحزب الوطني الفاخر
عموما اديه عرف المعلومات ديه .. وطبعا مش هيغير حاجه من تفكيره
عجبني اوي تجميعك لكل الفراعنه اللي في التاريخ ولو انك نسيتي رئيس جمعية الديكتاتورين العالميين عم الناس دي كلها " هتلر " باشا
تحياتي ليكي ومدونتك الرائعه
اسمحيلي اضيفها عندي وابق ياتابعها من وقت للتاني
تحياتي

بحبك يامصر said...

الاخت شيماء
مدونه فعلا هايله واشكرك على زيارتى اللى عرفتنى طريق مدونتك
وشكرا على معلوماتك القيمه عن غراعنة الزمن المختلفين على رأى الاخ زيكا
بالنسبه للاستاذ محمد فوزى كلامك جميل بس احب اصحح ليك معلومه ان ربنا مخلقش ابليس من اجل الغوايه لكن ربنا خلق ابليس من اجل عبادته ولكنه عصى واستكبر وابى ان يسجد لأدم عليه السلام وطلب من الله عز وجل ان يجعله من المنظرين الى يوم الدين وهذا نوع من التحدى لله عز وجل واجابه الله طلبه وجعله من المنظرين
اما بخصوص باقى كلام حضرتك ممتاز واكيد مفيش حد هيختلف عليه

Marvel said...

كلامك مضبوط 100 في 100

لكن مفيش حد بيقرا تاريخ ولا بيبص حوله عشان يتعلم

ربنا يهدي

محمد فوزي said...

الأستاذ بحبك يا مصر , شكرا على تصحيحك ليا للمعلومه بس اكيد حضرتك عارف ان ربنا سبحانه وتعالى لم يفاجأ (حاش لله) من تصرف ابليس وانه كان سابق في علم الله انه هيعصي ومن ثم يصبح من المنظرين لغواية بني آدم ..طب ليه هيعاقبه ؟
لأنه ترك ليه حرية الإختيار لكن كان يعلم انه هكذا سيختار , وبلاش ندخل في الموضوع ده لأننا مش هنخلص
تحياتي

مصر اللى مشفتهاش said...

هههههههههههه...ليه الفضايح ديه يا شيمو..

بصى هو الحزب ده خلاص مبقاش بيهمه فضايح .. وبما انه إذا لم تستحى فاصنع ماشئت فهما خلاص نسوا حكاية الحياء ديه من زمان .. لما بلطجتهم توصلهم لانهم يمنعوا اى حد يدخل الاتنخابات وعدين بكل بجاحة يطلعوا يقولوا انتخابات نزيهة ..!! عادى توقعى منهم اى حاجة .. والوقائع اللى عرضتيها لفراعنة كتير ربنا انتقم منهم فى الدنيا قبل ما يذوقوا عذاب الاخرة مبقتش موعظة ليهم .. دول حتى لو جهلة وميعرفوش عن هتلر او عن فرعون اواو ..فأكيد شافوا صدام فى التلفزيون ولا معندهمش تليفزيونات كمان..؟؟

ديه قصة جمييييييييييلة جداا ممكن تتضاف للقصص اللى سردتيها قصة حقيقية عن وزير ظالم عذب وطغى كتير ..
http://www.almesryoon.com/ShowDetailsC.asp?NewID=46813&Page=7&Part=1

تحياتى يا شيماء على البوست الجميييل..:)

شقاوة شعب said...

محمد فوزى

فعلا مناقشة جميلة تستحق المتابعة باهتمام
مثال ابليس : لكن بنفع اقول يارب ابعد عنى الشيطان فربنا يستجيب ويبعده
ويظل تشبيه بعيد شوية عن علاقتنا بالحكام
لانى لازم احاسبهم واقولهم انتوا غلط بكل الوسائل الممكنة حتى لو ماستجابوش ..بس ماقدرش اقولها
ولما اقولها اقولها بصوت عالى .. من فوق كل منبر يتاح ليا
ولو فى ايدى اغيرهم خالص اغيرهم ... ودى متاحة لينا بالبطاقة الانتخابية اللى حضرتك دعيتنا لاستخدامها ..فدى اتفق تمام فيها معاك

مثال الاوانى المستطرقة : اتفق معاك تماما لما قلت "الحكام الأجانب مبيظلموش مش لأنهم مبيحبوش الظلم إنما لأن اللعيبه بتاعتهم من النوع اللي ميتظلمش "
واتفق معاك تمام كمان لما قلت "النضال من وجهة نظري ان كل واحد في موقعه يقف ويبقى سد الفساد "
لكنى شايفاها مش كفاية

لكنى الحقيقة مش متفقة معاك قوى لما قلت : إذا المواطن قوى ومنيع فلن يستطيع أحد أن يصب له سائل الفساد"

ازاى يا فندم ؟؟؟ ازاى تبقى القمة بايظة والقاعدة سليمة
ازاى تبقى المنظومة فاسدة وتفريعاتها مش فاسدة
ازاى تبقى بتسرق واللى تحتك صنم مابيتأثرش بيك ومابيقلدكش؟؟ ازاى ؟؟

طبيعى لو اول حلقة فى العقد انفرطت .. كل الحلق بعدها هتنفرط هى كمان

خلينى اضرب مثال :لو عندك ضرس مسوس خالص وبايظ والعصب فيه تاعبك ...وللاسف بسببه السوس بدأ ينتقل للاسنان المجاورة ... تعالج الاسنان المجاورة من السوس اللى فيها ولا تخلع الضرس ده خالص او تعالجه حتى لو تمن علاجه اغلى من علاج باقى الاسنان الصغيرة ؟؟

اللى اقصده ...ان ده لا يغنى عن ده
العمل على الجبهتين مطلوب .. اصلاح الذات ومحاولة اصلاح المجتمع وفى نفس الوقت بذل كل ما يمكن بذله لاقتلاع مسببات الفساد

جميل لحد كدة ؟؟

ننتقل للتعليق اللى بعده
حضرتك قلت : يبقى مينفعش ندي الحق لمجموعة أفراد انهم يدعوا احتكار الصواب
اللى اعرفه فى مجال اختيار القادة السياسين ان ليك بالبرامج .. ماليش دعوة هو بيدعى ايه ...لانك منين هتثبت انه على حق او باطل ؟؟
زى مثلا اختيار اعضاء مجلس الشعب ... كل عضو بيقول انا احسن واحد فى الدنيا ... بتيجى انت كناخب تبص بعنيك على برنامجه وطبعا على نشاطه قبل الدخول وتختاره على هذا الاساس... وبعد كدة بتديله فرصته اللى مدتها خمس سنين بتختبره فيها ... والله طلع كويس خير وبركة بتنتخبه تانى ...طلع اى كلام بتختار غيره

لكن مش معقول ابدا ابدا انك تشوف العضو بتاع دايرتك مابيعملش ى حاجة فى حياته وكمان بيسرق اهالى الدايرو ومقضيها فساد وبعدين تقول لأ انا مش هسعى لتغييره واختار فلان الفلانى لحسن يطلع وحش ... نظرية غريبة ... طب ماتجربه لو وحش يبقى ماخسرناش حاجة واحنا كدة كدة وكنا هنقعد فى فساد ..طلع حلو يبقى انت الكسبان

جزئية اللى بيستنجد بأمريكا وياخد منها اوسمة : ممممممم مافهمتش قوى ايه علاقتها بالموضوع بس ممكن حضرك تقصد تشير بيها لحد معين ..بس ايا كان الحد فزى ماقلت الاختيار فى ايدك .. المهم تسعى للتغيير

اخر جزئية فى تعليقك اتفق معك فيها جملة وتفصيلا
وزى ما قلت ان قناعتى هى التغيير بكل وسائله ..سواء تغيير انفسنا زى ما حضرتك قلت او السعى لاجتزاز الفساد والظلم من منبعه ... كل على قدر استطاعته

مش كدة ولا اييييييييه ؟؟

شقاوة شعب said...

marvel

بالذااااات بتوع الحزب الوطنى ... والله ضايعين ... ولا تسمع ارائهم فى اى موضوع تحس على طول ان اللى ادام ده مابيعرفش يقرا ويكتب اصلا
__________________________________

مصر اللى ماشفتهاش

البلطجية دول ابناء الحزب الوطنى وعكازه الى بيتسند عليه
لانهم ماعندهمش فكر يسندهم

وسلميلى قوى قوى على الفكر الجديد

زهرة العرب said...

السلام عليكم
كلام جميل بس بجد في الاول والاخر احنا اللي غلطانين احنا اللي عملنا في نفسنا كدهانا قرات مناقشتك مع الاخ محمد فوزي انا فعلا متفقة معاه في جوانب كثيرة
واحب اقول "لا يغير الله ما بقوم حتى يغيروا ما بانفسهم"
وكان فيه مقولة سمعتها قبل كده مش عارفة دي حديث ولا لا الله اعلم وهي بمعني ان لما الناس تظلم بعضها ربنا يسلط عليهم حاكم منهم يظلمهم
وده بالظبط اللي احنا فيه لو كل واحد اتقي ربنا في حاله وعمله واهله وبلده والناس اللي حواليه اكيد هنبقى احسن اكيد ربنا هيرضي عننا اكيد لما ندعي ربنا يكشف عننا الكرب اللي احنا فيه اكيد ان شاء الله ربنا هيستجيب
كنت كتبت موضوع عن كده
لازم الاول نعرف ازاي نحب بلدنا علشان نخليها تحبنا
وسلامي لكي اختي العزيزة

ولــــــــــو said...

ماشاء الله
البوست قيم وبيدي امثلة كتير لمصير من كانوا يعتقدون انهم مخلدون ف الدنيا دي
وبصراحة معجب جدا جدا بالنقاش المحترم والردود الممتازة اللي صاحبت البوست
ربنا يكرمك

شقاوة شعب said...

zika

اهلا بيك فى المدونة ..وماتقلقش اقعد براحتك والفطار والغداء والعشا علينا

فعلا الحزب الوطنى اعضائه اغلبهم ضايعين فكريا
اما هتلر باشا ... ده عمهم كلهم
على فكرة مات منتحر ... لما جاب اخره من الدنيا
________________________________

بحبك يا مصر

اهلا بيك فى شقاوة شعب
وحلوة كلمة الفراعين دى

micheal said...

أتمني للحزب الوطني خليط و كوكتيل لذيذ من نهايه كل الذين جاءت سيرتهم في البوست و ده أقل حاجه للحزب الوثني
تحياتي

Hosam Yahia حسام يحى said...

بجد

بوست هاااااايل

وفيه جهد مشكور

ربنا يوفق حضرتك
ويجعله فى ميزان حسناتك

سمية said...

بوست حلو فعلا
انتى عارفة النهاردة انا سمعت تقريبا نص الكلام اللى انتى كاتباه قبل ما اقراه.

اسمحيلى اعلقلك على نقاشك مع محمد فوزى

انا هعلق على نقطة انتى بتقولى

ازاى تبقى القمة بايظة والقاعدة سليمة
ازاى تبقى المنظومة فاسدة وتفريعاتها مش فاسدة

هو لما بتيجى تبنى بتبنى القاعدة الاول ولا القمة؟؟
لما تكون القاعدة صح بتكون القمة صح
يعنى فساد القمة نتيجة فساد القاعدة وليس العكس
يعنى لما أسس صح
كل اللى فوقيه يطلع صح

والشعب ليس فروع المنظومة
وانما الشعب هو اصل المنظومة


ازاى تبقى بتسرق واللى تحتك صنم مابيتأثرش بيك ومابيقلدكش؟؟ ازاى ؟؟

ماحنا قلنا دى بقى نتيجة

ولا ايه رأيك؟

(green eyes) said...

بشكرك على المعلومات التي اتيحت لي من خلال مدونتك.
كل هؤلاء عبرة لمن يعتبر
تقبلي مروري

حـريــة الــفـكــر والابــداع said...

موضوع جميل
بس صاحبنا بتاع الوطنى معقول مش عارف تاريخ حزبة

ريحانة said...

اعتقد كل الكلام اتقال
مش حاتكلم كتير
بس عايزة اقول ان اكبر دليل على ان النظام مش قوى ومش حايستمر كتير غير سنة الله طبعا اللى حاتحقق اكيد
الجهل المطبق لقيادات الحزب واللى هو منها واللى بتوصل لعدم معرفة اصل حزبه اصلا
ان دل ده على شىء يدل ان النهاية قربت اوى
اوى

ayman badr said...

بوست جميل جدا وانا بعلق مش رد للتعليق عندى لأ بجد عجبنى البوست قوى وهكمل قراءة وتعليق لأن المدونة بتبشر بأسلوب قوى فى الكتابة وفى المواضيع والمضمون
عجبنى الحصر التاريخى لنهاية كل ظالم متجبر للعظة والعبرة باينك مذاكرة تاريخ كويس
نسيتى الملك فاروق برضة اللى طرد زى الكلاب برة البلد اللى ياما بهدلها
تحياتى

أحمد علي said...

الحلقة المحظورة ...
الأن في صحبة ........
دعوة عامة
تدعوكي مدونة الصحبة للرد علي أبشع المقالات عن الأخوان المسلميين .... بالله عليكم أرجوا الرد لنعرف من علي صواب

* الأخوان تخلوا عن الشعب
* من الصحبة الي الأخوان

و أكثر ... بل و أبشع ... فقط في الحلقة المحظورة ... علي مدونة صحبة بالله عليكم أدخلوا هنا
وشوفوا انا عندي حق ولا لأ بس ردوا
أوكية
http://so7bah.blogspot.com/

كما أتمني أن اكون من مدوناتك المفضلة التي تزورها دائما .... أنتظرك في مدونتي

شقاوة شعب said...

زهرة العرب

يا حبيبتى انا اصلا متقفة معاكى جدا ومع محمد فوزى

لكن مانقعدش نركز على اصلاح النفس والأفراد ونسيب اللى فوق دول يفضلوا يعكوا من غير رقابة او محاسبة مننا كشعب
ده حتى دينينا فى الالام ماينفعش ... وفكرة المعارضة لها تأصيل شرعى فى الاسلام
سيدنا ابو بكر رضى الله عنه كان بيقول اذا اخطأت فقومونى ... والتاريخ فيه كتير جدا من القصص اللى فيها وقف احد المسلمين يعارض احد الخلفاء ...مع الفارق طبعا فى رد فعل الخلفاء رضوان الله عليهم على هذه المعارضة ورد فعل حكامنا دلوقتى
_________________________________

ولو

الله يكرمك ... وجزاك الله خيراع على المرور
________________________________

micheal

هههههههههههههه
عندك حق يا مايكل .... هما عايزين فعلا كوكتيل من كل النهايات دى
والشعب بدأ يفوق الحمد لله وهيعملهم فخفينا قريب
______________________________

حسام يحى

تقبل الله منا جميعا صالح اعمالنا واشكرك على المرور
________________________________

سمية

منورة يا سمسم .... وجميل دخولك فى النقاش

بصى يا توتة انا كمان مقتنعة ان القاعدة بتيجى الاول ثم القمة
لكن فى الوضع الحالى القمة هى اللى بتمشى القاعدة وهى اللى بتتحكم فيها وبتشكلها عل مزاجها
عايزاها حلوة تخليها حلوة ... عايزاها كلها فساد ومصايب يبقى ع البركة
يبقى دلوقتى ايه الحل ؟؟ استنى لما اصلح التامنين مليون عشان يطلع منهم واحد عدل ... ولا اشيل القمة الخربانة دى خالص واجيب واحدة عدلة "تسمح" للقاعدة انها تكون سليمة هى كمان بل وتساعدها وتدعم كل الجهود اللى تخلى القاعدة سليمة ؟؟
________________________________

(green eyes

مرور مقبول .... وجزاكى الله خيرا
________________________________

حرية الفكر والابداع

اه والله مش عارف تاريخ حزبه .. تصدق؟؟
ده كان منظره ساعتها صعب قوى
_______________________________

ريحانة

جهل بس ؟؟ ده جهل وتخلف وثقافة ضحلة وبلطجة ...... وفكر جديييييد
_____________________________

ayman badr
والله حضرتك تنور المدونة وجزاك الله خيرا على اطرائك
اما عن الملك فاروق ...فعندك حق.... مش كان كلب للانجليز
وفى الاخر نفعوه بايه ؟؟
________________________________

أحمد على

حاضر هنروح هناك ان شاء الله ونشوف ايه الحكاية
وجزاك الله خيرا

فليعد للدين مجده said...

الاخت المحترمة شيماء
شكرا لك علي هذه التدوينة التي أثارت مثل هذا الحوار القيم
لكني متضامن مع وجهة نظر محمد فوزي وسمية في ان نقد الحكومة وانتظار انهيارها ليس هو السلوك الامثل في هذه المرحلة وان كان هو السلوك الشائع وهو سيد المرحلة بلا منازع وسبب ذلك انه ثقافة شعب
نعم انها ثقافة هذا الشعب في شتم الحكومة عندما يرون جائعا أو فاسدا او سارقا ويسنسون دورهم الذي شرعه الله في اطعام الجائع ونصرة المظلوم ونهي الفاسد

يؤسفني ان اقول ان الحكومة ليست هي المسئول الاكبر عن الفساد
نحن المفسدون سواء بايجابية كفاسدين او بسلبية كساكتين

ثم اننا لسنا في قضية التغيير مطالبن باعادة اختراع العجلة

المطلوب واضح تغيير ما بانفسنا حتي يتغير ما حولنا
هي باختصار اصلح نفسك وادع غيرك

خبيب said...

أن نظامك ليس قوي .. ولن يستمر

---

تماااااام

هو ده الكلام المفيد

---

وبعدين هو من كبار الحزب الوطني لأنه مش عارف تاريخه !

أو عارفه

وعامل أكنه مش عارفه !

mady said...

بصي ياشيماء انا والله معديه
هنا بالصدفه
مع احترامي لاسلوبك
واحترامي للفكره
واحترامي لطريقه العرض
غلط قوي لما تحطي الرئيس
الراحل محمد انور السادات
والرئيس صدام حسين بين الناس دي
لان كل نظام له عيوب
واحطاء
الناس دي ماتت شهداء
وياريت نقرا التاريخ كويس

شقاوة شعب said...

فليعد للدين مجده

الاستاذ الفاضل .. مرحبا بك
قلت فى تعليقك : نعم انها ثقافة هذا الشعب في شتم الحكومة عندما يرون جائعا أو فاسدا او سارقا ويسنسون دورهم الذي شرعه الله في اطعام الجائع ونصرة المظلوم ونهي الفاسد

ردى : هذا من قبيل نهى الفاسد ... وكل ابواق المعارض هى من قبيل نهى الفاسد

قلت فى تعليقك : يؤسفني ان اقول ان الحكومة ليست هي المسئول الاكبر عن الفساد
نحن المفسدون سواء بايجابية كفاسدين او بسلبية كساكتين

ردى : مادينا اهو مش ساكتين ... والشعب فعلا بدأ يتفاعل ويبقى ايجابى
مش لازم يعنى يعمل ثورة عشان يبقى اسمه " مش ساكت " لكنى يقول رأيه من خلال كل قناة سلمية مشروعة ومتاحة

واخيرا اتفق مع حضرتك تماما فى جملة اصلح نفسك وادع غيرك

__________________________________

خبيب

لأ هوفعلا مش عارفه ... كان نفسى تشوفوا منظره وهو بيجاوب بثقة وبيقول : ايوة طبعا الحزب الوطنى اساسا كان الحزب الوطنى بتاع الزعيم مصطفى كامل
كان شكله وحش قوىىىىىى

__________________________________

mady

اولا منورة المدونة
ثانيا مش مضطرة ابدا تقدمى كل هذه "الاحترامات" عشان تخالفى رأيي ...ماحنا لو مش مختلفين فى وجهات النظر يبقى مش هيكون فى حاجة اسمها "فكر" ... ولا اييييه ؟؟

بالنسبة للسادات وصدام .. مش هفتى فى كونهم شهداء او لأ ... لكن ما اقصده ان فى حاكم ظلم ونهايته كانت غير ماهو توقع
يعنى الحاكم الظالم غالبا مابيظن انه هيموت فى سرير حرير فى حرير وراسه على مخدة ريش نعام .. وجيشه راضى عنه وشعبه عبيط مابينطقش ولا بيعارضله كلمة
ده اذا ظن انه هيموت اصلا .... فى ناس بتفوت عليها النقطة دى

لكن اللى حصل فى المثالين غير كدة
صدام -وبعيدا عن انه شهيد او لأ- لكن فى النهاية كان دكتاتور وكان بيبوس رجل الامريكان فى الرايحة والجاية ... فى الاخر الامريكان احتلوا بلده وقتلوه يوم عيده
فى الاخر أكيد صدام ماكنش يجى على باله لحظة ان نهايته هتكون على ايد الناس اللى باس جزمتهم
صح ولا لأ

اللى عايزة اقوله ان فى ناس بتظلم وهى فاكرة انها هتخلد فيها وده مش حقيقى ومش هيحصل

والف تحية ليكى يا مدى على نقاشك الراقى

appy said...

ايه ده نا سبت تعليق هنا قبل كده قوليلى كده مين اخد التعليق بتاعى

ازعل انا بقى كده يا شيموووو
عااااااااااا
بس لما ارجع من الاجازة اعلق ليكى عليه كله

الفاتح الجعفري said...

نعم ان نظامه ضعيف واضعف ممايتخيل ,يقول الله عزوجل
افمن اسس بنيانه على تقوى من الله ورضوان خير ام من اسس بنيانه على شفا جرف هار فانهار به في نار جهنم والله لا يهدي القوم الظالمين
..........
وكلنا يعلم كيف اسس هؤلاء انظمتهم وممالكهم ,اسسوها علي ظلم وتجبر هم واعوانهم
جاء رجل الي سيدنا سعيد بن جبير وهو في السجن وكان هذا الرجل حارس السجن وقال للامام اانا من اعوان الظالمين؟
قال له الامام لا
بل انت من الظالمين انما من اعوان الظالمين من يغسل ثوبك ويعد طعامك
وهذا الرجل من الظالمين
نسال الله العفو والعافيه
وجزاكم الله خير

tamooh said...

أعتقد انه بعد اللى بيحصل فى البلد اليومين دول
أى واحد معاه حتى كارنيه الحزب يخبيه أحسن الناس تعمل فيه حاجة

.. المشكلة انه كمان مش عارف الحزب تاريخه ايه ..
طبعا يا بنتى مش فاضيين طاحنين نفسهم
فى هموم البلد ومشاكلها والنتيجة باينة زى الشمس ..

وبطلوا حقد بقة :)

شقاوة شعب said...

appy

لأ بقى ... من فضلكم يا جماعة اللى أكل تعليق آبى يطلعه
بدل ما نضطر نفتش المدونات .. ونقول كل واحد يفتح مدونته
وعلى ايه ... من غير شوشرة كدة التعليق يطلع

وفى انتظار عودتك بالسلامة يا آبى من الاجازة
________________________________

الفاتح الجعفرى

مشاركة راائعة وقصة معبرة جدا
جزاك الله خيرا
________________________________

tamooh

عندك حق... احنا الحقد مالى قلوبنا
وهما ربنا يحرسهم مش موقفهم حاجة ...شغالين فحت فى البلد لحد ما هتخلص فى ايديهم

تحياتى يا سكرة

ebn_egypt said...

ماشاء الله ..

شكلك واخدة دكتوراة فى تاريخ الجبابرة :)

شقاوة شعب said...

ebn_egypt

ههههههههههه
مافيش دكتوراه ولا حاجة

ده تاريخ ومكتوب ومتسجل يشهد على ظلمهم الى يوم القيامة

همسات شاب said...

عادي جدا

وطبيعي

والمفروض اننا ما نستغربش

ولكن لكل ظالم نهاية

وهذا هو حسبنا

كاشف الاوهام said...

اتفلوا شوفوا الجهل بعينكم

http://scandal--blogger.blogspot.com

عصفورى الحبيب كى جى ون بتنادى عليك

MEDUS said...

عزيزى لية شايفها سودة كدة فى حاجات كتير لسة كويسة فى مصر ويريتك تسبها وتسافر علشان تحس انك لو عايش فى مصر منغير اكل او شرب مش هتموت
http://illupo77.blogspot.com

will said...
This comment has been removed by a blog administrator.