Saturday, May 3, 2008

مدخنون ومدخنات



مما لا شك فيه -دى الجملة اللى اتعودنا نبدأ بيها موضوعات التعبير- اننا كلنا دلوقتى ملاحظين زيادة عدد المدخنين فى الشعب
المصرى
بس مش ده الجديد ... الجديد هو زيادة عدد المدخنات فى الشعب المصرى
وده طبعا بعد ما بقت الشيشة موضوة قديمة جدا





تقريبا مش هتنزل الشارع فى اى يوم تقضى اى مشوار من غير ماتقابل عربية معدية ادامك سايقاها ست وفى ايديها سوجارة
ومش هتروح او هتروحى النادى من غير ماتلاقى الترابيزة اللى جمبك عليها اسرة والأم قاعدة فى النص وفى ايديها
السوجارة

الموضوع فعلا زاد بشكل مش طبيعى وفى فترة قصيرة جدا .. والملاحظ انه بين الطبقات الاجتماعية المرتاحة
مما يدل على انها من قبيل " الموضة" او يمكن " المنظرة" او ايا كان التفسير فمش ده اللى محيرنى
الحقيقة اللى محيرنى وعايزاكم كلكم تشاركونى فى تفسيره

هو كيف ننظر للمرأة المدخنة ؟؟؟

بمعنى .... هل نبدأ نناقش المشكلة من باب ان ازاى الستات تمسك سيجارة وتدخن فى الشارع
ده مخالف للحياء .... فين التربية ..... دى المفروض بنت ..... ده غير انها بتتسبب فى فتنة غيرها من البنات اللى هيحبوا يقلدوها
؟؟

ولا

نناقش المشكلة من باب إن حرمانية التدخين عامة .. . على الراجل والست
واضراره الصحية عامة ... على الراجل والست
والمسألة مش مسألة اللى ماسك السجارة ده جنسه ايه .... لكن المسألة مسألة كيف نساعده على الاقلاع عنها ؟؟؟


ياريت بجد اعرف رأيكم بكل حرية وشفافية ونزاهة
-ودى الجملة اللى اتعودنا نسمعها من الحكومة-




..

24 comments:

micheal said...

بالنسبه لي أنا لا أنظر نظره سلبيه للمدخنه لاني مقتنه بأن التدخين عاده سيئه مضره بالصحه ينبغي أن يقلع عنها المدخن و المدخنه علي حد سواء
:)
تحياتي

فرنسا هانم said...

ما بلاش الشفافيه
عموما السيجاره دى بتضيع معالم الانوثه تماما
بجد 95 فى الميه من الرجال لا يفضلون المرأه المدخنه
و90 فى الميه من النساء لا يفضلن الامرأه المدخنه
ارقام دى من رؤيتى انا لا من احصائيات
عموما الكلام عن تدخين المرأه بيخنقنى
اقوم اضربلى معسله علشان اتضايقت

هوندا said...

اولا حرام بغض النظر عن بنت او ولد
ثانيا أذيه انا بكره السجاير بشده وبكره م الى بيقرفنا بدخانه لانه ماشى يوزع امراض ومش من حقه انه يحرمنى من حرية التنفس
كمان الى ساعد اتتشار ده الاعلام النيله الافلام والمسلسلات بقا عادى جدا تجيب واحدة بتدخن او واحد

بجانب ان فعلا الانوثه بتضيع فى القرف ده مش منظر حتى

أبو أسامة said...

السلام عليكم ورحمة الله وبركاته
أنا أرى أنه لابد من التأصيل الشرعي للقضية بمعنى الحديث عن حرمة التدخين للجنسين على التساوي

ولكن هذا لا يمنع أن نتحدث عن التدخين من الناحية الاجتماعية أو حتى الاقتصادية
فالنبي صلى الله عليه وسلم هو القائل :
خاطبوا الناس على قدر عقولهم

محمد عبد الغفار said...

الموضوع مش كثره بقدر مهو ارتفاع سقف الحريه والامبالاه بالمجتمع

اما نظرتى للمدخنين والمدخنات فمبتفرقش الأثنين مقرفين

بحبك يامصر said...

انا بما انى رجل ومدخن فأكيد مش هكون محايد بس هحاول
انا عارف ان التدخين مضر وادام هو مضر يبقى اكيد حرام شرعا
يبقى حرام على الراجل والست على حد سواء
اما من الناحيه الاجتماعيه
اكيد الست اللى بتدخن مش هتلاقى تشجيع من العقلاء لان التدخين يفقدها انوثتها وجاذبيتها
وذلك لارتباط التدخين فى مجتماعتنا بالرجل دون الست

فليعد للدين مجده said...

نظرتي للمدخن- سواء كان رجلا أو إمرأة- أنه مريض نفسيا وشخصية غير سوية

إخوانى مخربش said...

ياعم وفيها ايه
نسبة المدخنين من الاناث فى لندن اكثر من الذكور

عيب يعنى الشعب المصرى المنفتح والبنات الابدايتيد

يدخلوا جحر الضب وراء الكفره ويقلدوهم


انا شايف ان الكلام يكون افضل لو اخدناه من الناحية الاجتماعية ومن جهة العادات والتقاليد

لان على السواء اللى بيدخن من الجنسين عارفين ان التدخين حرام

الافغاني said...

الاتنين بلوة سودة

الحمد لله الذي عافنا

مصر اللى مشفتهاش said...

خلاص ياشيمو الشعب المصرى هيقاطع السجااااااااير مجبر ..:))

بس اللى نفسى فعلا اعرفه..السجاير دخانها لايطااااااااق ازاى بيستحملوه اللى بيدخنوا سواء بنات أو ولاد..؟؟

جمعاوي said...

السلام عليكم
هو إضافة للي كل من شرفوا مدونة حضرتك بالتعليق فأنا مش هعرف أقول أحسن من اللي اتقال

بس أنا كدارس للطب-وياريتنا ما دخلناه-بأشوف أثناء الدراسة إنه التدخين أضراره على الأنثي أكثر من الذكر بكثيير وخاصة وقت الحمل ...كمان هو بيعمل مشاكل أكتر في الأسنان سواء للذكر أو الأنثى على حد سواء بس نظرا لتعرض الانثى للإصابة ببعض الأمراض أكثر من الرجل نظرا لضعفها الفسيولوجي الواضح فده بيخلي التدخين بالنسبة للإناث مشكلة كبيييييرة جدااااااااا

ونسألكم الدعاء علشان الامتحانات

أحمد كجول said...

أولا السلام عليكم
ثانيا : جأت لك بنبأ هام و عاجل
لقد وجدت في مدونتك و تدويناتك انك من مدوني الأخوان ولذالك
أطلب منكي الرد علي أبشع تسألات علي الأخوان المسلمين
نحن
شباب مصر ,, نرجو الردود
شباب مصر ,, نريد أن نفهم
شباب مصر ,, نريد حلا او جواب
شباب مصر ,, نرجو الردود



http://so7bah.blogspot.com/

و عموما شكر للأستجابة ان أستجبتم
و شكرا علي الصمت أذا صمتم

احمد كجول

شقاوة شعب said...

micheal

اذن رأيك ان تحكم على التدخين فى حد ذاته كعادة صحية سيئة لا على جنس المدخن
جميل جدا
__________________________________

فرنسا هانم

اذن رأيك هو النظرة الاجتماعية للموضوع ..يعنى اكثر مايثير استهجانك هو جنس المدخن لا العادة نفسها
_________________________________

هوندا

اذن رأيك زى فرنسا ...واللى بيضايقك فى التدخين ان المدخنة بنت
_______________________________

أبو اسامة

افهم من كلام حضرتك انك لو شفت بنت ماسكة فى ايدها سجارة المنظر مش هيلفت انتباهك او يضايقك ؟؟ زهيبقى عادى كأنك شفت ولد بيدخن ... لكن اللى هيضايقك فى الموضوع ان التدخين حرام وفقط
__________________________________

محمد عبد الغفار

اذن رأيك هو ان المدخ شكله بيضايقك بشكل عام ... ومش هتضايق اكتر لو كان المدخن ده بنت
________________________________

بحبك يا مصر

اذن كون المدخنة بنت ده بيثير استنكارك اكثر من عملية التدخين فى حد ذاتها ..لانك بالفعل مدخن
_______________________________

فليعد للدين مجده

يتضح من كلام حضرتك ان التدخين فى حد ذاته هو مايضايقك لا صاحبه او صاحبته
_____________________________

اخوانى مخربش

اذن يهمك ان مايكونش المدخن بنت ...لان دى فى حد ذاتها تزيد نسبة الخطأ من وجهة نظرك
_______________________________

الأفغانى

يعنى مش هيزود ضيقك انها بنت ... الفكرة عندك فى التدخين نفسه اللى بيضايقك
_______________________________

مصر اللى ماشفتهاش

لم يتضح رأيك يا عائشة ...لكن عندك حق فى اضافتك .. كله هيبطل تدخين بعد كدة عشان السجاير غليت مع البنزين

حكومة خايفة على صحة مواطنيها
_______________________________

جمعاوى

معنى كلامك ان مش مشكلة شكلها كبنت بتدخن لكن المهم صحتها

جميل

عصفور اسكندرية said...

المرأه المدخنه ما هي الا نتاج طبيعي لما تعيشه احد الطبقتين المدخنتين في مصر
الطبقه الاولي
سيدات الاعمال او سيدات الثروه ودا عادي عندهم
الطبقه الثانيه
البنات اللي رايحه ومش بتيجي
اما شغاله في الصنف او سابت حب بايظ او بنات الشوارع

وما حدث مؤخرا من ازدهار حركه الكافيهات المحترمه في مصر امثال كارلوس و كوستا وستاربكس وانتشار فئه البنات الفارفير بتوع بابي ومامي
ساعد علي ازدهار حركه الشيشه في هذه الطبقه ولا سيما بعد مزول السوق انواع جديده من الشيشه المصريه المعتبره

اسف علي بعض الالفاظ السابقه
تحياتي

tamooh said...

.. عندى حساسية من السجاير بس لو شفت واحدة بدخن مش عارفة هحس صراحة ساعتها بايه ؟؟؟
اكيد هبصلها الاول مستغربة..
بنت وبتدخن
وبعدين هفوق وافكر
فعلا انه حرام بعيد عن كونها واحد او واحدة

نفسى اعرف بيدخنوا ليه الحمد لله يعنى بس الكل عارف انه مضر
؟؟ واحيانا بيكون واحد قريب ليكى و يقولك عارف انه مضر
بس برده مايبطلوش

الهم احفظ شباب المسلمين

بحبك يامصر said...

انا اول من بطل السجاير
اعتراااااااااااااااااااااض على زيادة الاسعار

alexandrany said...

اكيد غلط من الناحيتين
تحياتي

عاليا حليم said...

انا مش عارفة بصراحة الى بيدخنوا دول سواء رجال او سيدات ايه متعتهم يعنى فى دخان بيخنق تنفسهم و ريحة كريهة بتطلع منهم ؟

ربنا يهدى

ام يحيي said...

غير طبعا انه حرام بحس ان البنت او
المرأة المدخنة واحدة بجحة (انا آسفة في الكلمة)

يمكن عشان اي واحدة(او واحد) بتعمل حاجة غير مألوفة بنعتبرها عايزة تلفت الانتباه ليها وخلاص ..وطبعا دي حاجة بتضايق

شقاوة شعب said...

عصفور اسكندرية

رأيك وضح .. لكن مختلفة معاك فى تعريفك للبنات المدخانت انهم اما واما واما
________________________________

tamooh

فى الاخر تنظرى لحرمانية المسألة بعيدا عن جنس اللى بيعملها
_______________________________

بحبك يا مصر

ههههههههههههه... الله ينور
هى دى الاضرابات ولا بلاش
________________________________

alexnadrany

يعنى كونها بنت هتفرق معاك .. مش كدة ؟
________________________________

عالي حليم

بتتخنقى من دخان السجاير لكن برضه ماقلتيش رأيك فى البنت المدخنة
________________________________

أم يحي

واضح جدا ان كون المدخن بنت ده بيضايقك جدا

- مدونة لساني هو القلم - عبدالرحمن فارس said...

الحمدلله ان ربني اكرمني بالإقلاع عن التدخين بعد حوالي عشر سنين من التدخين

يارب كل المدخنين يبطلوا

استغربت مرهاني لقيت سيدة مجتمع مصريه بتشرب سيجاره كليوباترا :)

بقى من حلاوتها يعني :))

ربنا يتوب ع الجميع

شقاوة شعب said...

عبد الرحمن فارس

مبروك تركك للتدخين
ودى طبعا حاجة ايجابية ومشجعة لناس كتير انهم هما كمان ياخدو الخطوة دى

همسات شاب said...

التدخين ده عاده سيئة مضرة بالمجتمع أكثر من المدخن

ولذلك أنا من رأئي اننا لازم نجبر المدخن على وقف التدخين لأنه بيضر بينا كلنا

وطبعا البنت المدخنة منظرها وحش
وده طبيعي بيأثر على صحتها
فمش مقبولة للبنت بالمرة

وتقبلوا مروري

ولكم مني جزيل الشكر

will said...
This comment has been removed by a blog administrator.