Thursday, January 8, 2009

نقاط على الحروف

مقدمة
تحدثت اليه فى غزة .. لا أعرفه ولا يعرفنى
قلت له قلوبنا معاكم .. وسامحونا على تقصيرنا
قال لى جملة لن أنساها ما حييت
الصاروخ اللى بينزل علينا تحت .. بيطلعنا نحنا لفوق
قلت له ألا تتممنى أن تترك غزة ؟
قال لى أبدا .. ولا انا ولا أولادى
هادى أرضنا وبنضل صامدين
************
احداث غزة تتلاحق كل يوم .. والكلام بيزيد فيها والنقاشات بتتعمق
والحقائق بتتشوه .. وعشان كدة حبيت أحط شوية نقط على الحروف يمكن نقدر نقرا الواقع بطريقة أفضل
النقطة الأولى ... دم المسلم
كلنا نفسنا نحج .. والكعبة بيت الله الحرام بالنسبالنا حلم وشوق وحب
ولو قالوا ان اليهود خدوا جيوشهم وطياراتهم ودبابتهم عشان يهدوا الكعبة .. الكل هيهب ويقول انا فيها قتيل
طيب .. يقول النبى صلى الله عليه وسلم
"لأن تهدم الكعبة حجرا حجرا أهون عند الله من أن يهراق دم إمرئ مسلم"
فماذا أنتم فاعلون ؟؟
النقطة الثانية .. الهدنة
كثر الحديث عندما رفضت حماس استمرار الهدنة .. وبالتالى تبقى هى السبب فى اللى بيحصل لغزة
ولكن لما نعرف ان اثناء الهدنة التى التزمت بها حماس تماما ..اسرائيل قتلت أكثر من 40 شهيد على ايام متفرقة
ده غير الحصار اللى قطعت فيه الكهرباء والماء والوقود وقفلت المعابر فى وش المعونات الانسانية
يعنى بتموتهم برضه .. لكن موت بطئ
هل بعد كل ده المفروض حماس تجدد الهدنة وتقول ندخل معاهم فى هدنة تانى .. ولا طالما كدة موت وكدة موت يبقى نموت واحنا على الاقل بندافع عن نفسنا وعن كرامتنا ؟؟
النقطة الثالثة .. الموقف المصرى
للأسف الشديد بندافع عن موقف مصر وكأن اللى بيتهموها بيتهموا الشعب المصرى
لأ.. الحقيقة انهم بيتهموا الحكومة المصرية اللى المفروض مانحطش راسنا فى الرملة زى النعام ونقول انها عملت الصح عشان نحسن صورة مصر
لأن الحكومة المصرية مش هى مصر ... والمفروض نعترف بأن حكومتنا أخطائها فى موضوع غزة فاااااضحة
فى الأول ليفنى زارتنا وبعدها بيوم الحكومة قالت لحماس مافيش قصف وبعدها بيوم بدأ القصف وبعدها حماس قالت دى الحكومة المصرية قالتلنا مافيش قصف وبعدها الحكومة المصرية مانفتش كلام حماس
يبقى معناها اييييييييييه ؟؟
عندنا وزير خارجية أول ما بدأ القصف على الفلسطينين طلع يقول : والله احنا حذرنا واللى مايسمعش للتحذيرات لا يلومن الا نفسه
يعنى بالذمة ده كلام يطلع من مسؤل محترم فى وقت الناس بتموت فيه بالعشرات كل يوم .. وكأنه شمتان فيهم ؟؟
عندنا رئيس دولة قالها بصريح العبارة أدام وسائل الاعلام كلها: احنا لازم نستأذن سلطة الاحتلال "اسرائيل"فى اى حاجة بتدخل لغزة لحسن يكون فى سلاح ولا ذخائر ولا متفجرات داخلة وهى مش موافقة عليها"
يعنى بالذمة لما سمعتوا الكلام ده حسيتوا ان مصر دى واقفة مع مين ضد مين ؟؟
وبعدين فى حد المفروض انه بيساعد حد يقوم مستأذن عدوه أدخله ايه ؟؟
معلش .. اصل رئيسنا يعرف فى الأصول وبيعمل حساب "للضيف" اللى هو سلطة الاحتلال
بعيدا بقى عن الحرب اللى بدأت من كام يوم ... غزة محاصرة بقالها أكتر من سنة والكهرباء اتقطعت وكل حاجة اتقطعت ومصر ماتهزتش فيها شعرة ... يعنى مساندة كاملة لاسرائيل فى تجويعها و قتلها لأهالى غزة
النقطة الرابعة ... المظاهرات
ناس كتير تقول وايه فايدتها .. دى صوت عالى وجعجعة ع الفاضى
لكن بنقول .. أ- المظاهرات هى نوع من أنواع التعبير عن الرأى بشكل علنى
ب- المظاهرات تنشر القضية لمن لم يتابع .. وده حصلنا كتير واحنا فى مظاهرة الاقى واحدة جاية تقولى : هو فى ايه؟؟
فاشرحلها وانا حاسة بحزن عميق انها مش عايشة معانا فى البلد
ج- المظاهرات بطبيعتها وسيلة ضغط على النظام .. طبعا احنا النظام عندنا مابيحسش اصلا .. بس لو تلاحظو بعد المظاهرات فى مصر وغيرها ابو الغيط طلع صلح العك اللى قاله فى حق الفلسطينين فى بداية القصف
وبالرغم ان النظام عندنا مابيحسش الا بعد مية مظاهرة مثلا .. فاحنا برضه هنتمسك بحقنا وهنعمل المية مظاهرة لحد ما الدم يجرى فى عروقه
د- ودى نقطة مهمة قوى قوى .. الشيخ أحمد ياسين قبل استشهاده قال فى حديث مسجل له ان مظاهرة فى جامعة الاسكندرية كعملية استشهادية فى فلسطين .. هذه المظاهرات هى نوع من انواع الدعم النفسى والمعنوى لاخواننا فى فلسطين .. فكما ندعمهم ماديا بالمال والدواء لازم ندعمهم معنويا باننا نقول بصوت عالى ... احنا معااااااااااااكم
يعنى مش معقول حكوماتنا تحاصرهم وتذلهم عشان تدخل كام شاحنة دوا .. وكمان الشعوب يبقوا ساكتين وقاعدين فى البيت يمصمصوا شفايفهم
معلومة : كل ما أكلم حد من اهالى غزة اجده يطلب منى استمرار المظاهرات لأنها تدعمهم معنويا بشدة .. لانهم بيحسوا من خلالها ان الشعوب معاهم .. فإذن هم على الطريق السليم
النقاط مازالت مستمرة .. فى الحلقة القادمة ان شاء الله
..

8 comments:

~*§¦§ Appy §¦§*~ said...

شيكو يا حبيبتى امبارح واحد صديق ليه بيسالنى وبيحكى ليه حاجات كتير عن حماس او بتتقال او عن فتح
عارفه ردى ايه قولت له انا مبدأى وقلبى ودينى هما اللى بيحكمونى
يعنى انا شايفه حتى اتنين اخوات بيقتلوا بعض اقول وانا مالى ولا اخلص بينهم وبعدين اشوف مين غلطان واصلح
حاجه تانيه ما بالك ان الاتنين دول جه عليهم واحد من بره غريب يبقى اقول يستاهلوا واقعد ادافع عن واحد واسيب اصل المشكله
انتى فاهمه قصدى طبعا يعنى اللى يقول حماس ولا فتح يبقى عبيط واللى يدافع زى حضرتك يبقى عبيط ههههههههههههههه
علشان ده مش وقته يا قلبى خالص خالص
بخصوص المدونات المحروقه كلفت ناس وهنجيبها

شقاوة شعب said...

ههههههههههه

آبى يا تحفة .. مين ده اللى عبيط ؟
ماشى مقبولة من آبى عشان هى ضيفتنا
لكن ىبى بس هى اللى تفقول كدة .. اى حد تانى هيقول هخلى آبى تجيب خرفانها وتنطجه بيهم

تعالى هنا يا ست أبى .. انتى كنتى بتردى على البوست اللى انا كتبته ولا على بوست تانى؟؟
فتح وحماس ايه اللى بتتكلمى عنهم
انا ماجيبتش سيرة الخلاف بينهم فى البوست

انا اتكلمت عن التدهئة اللى كانت بين فصائل المقاومة واسرائيل واللى انتهت مدتها فى شهر ديسمبر ولم ترغب حماس فى تجديدها بسبب انها كانت الطرف الوحيد الملتزم بالتهدئة

يعنى ده اصلا مش وقت الكلام عن العلاقة بين فتح وحماس
ده وقت الكلام عن "الفلسطينين" واسرائيل
وده كان محور البوست
بس منورة يا آبى

بخصوص المدونات المحروقة .. تسلمى يا قمر
وهتابع معاكى ان شاء الله

~*§¦§ Appy §¦§*~ said...

يا حبيبتى انا عارفه بس بنقل لكي بعض الافكار اللى بتحصل موضوع التهدئه انا شايفه ان اسرائيل هطله سلاح ايه اللى مع حماس هما خايفين منه
غير كده انا موافقه على الانسحاب التام من غزه
بقولك ايه يا بنت انتى عاوزه تعرفى القصه بالظبط اللى انا موافقه عليها اقري بوست اخر بوست لمدون اسمه فشكول هتلاقيه عندي فى الريدر
موضوع انتى عبيطه عادي يعنى اختك الكبيره بتقولك انتى عبيطه يبقى هي ايه ها قولى

شقاوة شعب said...
This comment has been removed by the author.
fahd said...

كويس ان الكميا ما اخدتكيش مننا


بارك الله في نقاطك وياريت تكتمل

المظاهرات هي كلمة اتقي الله التي كانت تقال للحكام
ولما لم يتنفع الان ان تقول ذلك للحاكم فيجب ان يجتمع الناس ليقولها


ثم ان المظاهرات حق مكفول في الدستور

dina said...

كل الكلام كوم يا شيماء و بداية البوست كوم تانى...انا بجد لما قريت اول كام سطر مع الاغنية حسيت انى هناك...انى مع الناس دى...انى نفسى اعملهم حاجة بجد مش بس كلام
بجد لك الله يا غزة

شقاوة شعب said...

آبى السكر

دايما ممنورة فى المدونة فى كل الأحوال
بمناسبة بوست فشكول .. لا أتفق معاه فى كل النقاط
وحاسة انه ساب حجات كتير جوهرية فى القضية
-------------------------------

فهد

هى دى
المظاهرات كلمة حق فى وجه سلطان جائر
ومتواطئ

___________________

دينا

ربنا يتقبل منك شعورك يا ديناوماتفكريش كتير واعملى اى حاجة وان كانت بسيطة

un4web said...

مشكووووووووووووور
http://www.alsadiqa.com